नयाँ शक्तिका संयोजक एवं पूर्वप्रधानमन्त्री डा. बाबुराम भट्टराईले आफ्नी छोरी मानुषीको जनवादी विवाह गराएका छन्।
नयाँ शक्तिका संयोजक एवं पूर्वप्रधानमन्त्री डा. भट्टराईले एक्ली सन्तान मानुषीको शनिबार सानेपास्थित निवासमा जनवादी विवाह गराएर नयाँ शक्तिमा क्रियाशिल तनहुँको रिसिङका जेकेन्द्र श्रेष्ठलाई ज्वाईं बनाएका हुन्। जेकेन्द्रले मानुषीलाई लगाइदिएको माला वाँध्न लोकसेवा आयोगकी पूर्वअध्यक्ष रहेकी मानुषीकी ठूलीआमा कयोदवी यमीले सघाइन्। माला आदानप्रदानपछि मानुषीले जेकेन्द्रसँग हात मिलाइन् र त्यक्रममा उनी खित्का छोडेर हाँसिन्। माला साटासाटपछि विवाहित नयाँ जोडीलाई सबैभन्दा पहिले मानुषीका हजुरबाले फुल दिएर वधाइ दिए। यस्तै, डा. बाबुराम भट्टराईले छोरी ज्वाईं दुवैलाई फुल दिएर काँधमा धाप मारी वधाइ दिए।
जनवादी विवाह भएकाले वधाइ दिन पुगेका कसैले पनि नव विवाहित जोडीलाई उपहार र खाम दिएनन्। बरु दुलाहा र दुलही दुवैले विवाह खर्चको रकम पुस्तकालय र टुहुरी बालिकालाई सहयोग गरेका छन्।
जेकेन्द्र र मानुषीले ५० हजार रुपैयाँ केन्द्रीय पुस्तकालयलाई तथा ५० हजार रुपैयाँ वैदेशिक रोजगारीको क्रममा खाडी मुलुकमा ज्यान गुमाएका पूर्व जनसेनाकी छोरी फूर्मी तामाङलाई सहयोग गरेका हुन्। उनीहरुले फुर्मीको शिक्षाका लागि पछि पनि सकेको सहयोग गर्ने प्रतिबद्धता जनाएका छन्।
