नेपाली कांग्रेसका सभापति सुशील कोइरालाको पार्थिव शरीरको अन्त्येष्टिका लागि पशुपति अार्यघाट लैजान शवयात्रा राजकीय सम्मानका साथ गरियो। मन्त्रिपरिषदको निर्णय अनुसार, पूर्वप्रधानमन्त्री कोइरालालाई राजकीय सम्मानका साथ उनको अन्तिम संस्कार गर्ने निर्णय गरेको हो।
यसरी राजकीय सम्मान दिनका लागि सरकारले एकदिन सार्वजनिक विदा दिने गर्छ। त्यस अलवा तीन दिन सरकारी कार्यलय तथा विदेशस्थित कुटनितिक नियोगमा झण्डा झुकाउने र कुनै औपचारिक कार्यक्रम नगर्ने तथा सबै नियोगहरूमा शोक पुस्तिका राख्ने गरिन्छ।
सरकारको निर्णय बमोजिम पूर्व प्रधानमन्त्रीहरूका लागि दिइने राजकीय सम्मानका लागि सेनाको एक छुट्टै टुकडीले शव उठाउनेदेखि शवयात्रा गरी पशुपति आर्यघाटमा विशेष सम्मानका साथ जलाउनेसम्मको जिम्मेवारी नेपाली सेनालाई दिइन्छ।
जस अनुसार नेपाली सेनाको मेजरको कमाण्डमा ४० जना सेनाका जवान सम्मिलित टुकडीले मृतकको शव विशेष राष्ट्रिय धुनसहित खटाइएका ब्राहमणहरूले सेनाको गाडीमा राख्छन्। उनीहरूले पशुपति आर्यघाटमा शवमा गर्नु पर्ने बैदिक परम्परा अनुसारको प्रक्रिया पुरागरी विशेष ढंगले सजाइएको चितामा शवलाई राख्छन्। अन्तिम दागवत्ति दिनेबेलामा सेनाको टुकडीले राष्ट्रिय गानको धुन बजाउनुका साथै खटिएका सुरक्षाकर्मीले आफ्नो हतियार झुकाएर सम्मान प्रकट गर्छन भने सेनाको अर्को टुकडीले सैनिकमन्चमा १३ तोप पड्काएर सलामी दिन्छन्।
राजकीय सम्मानका लागि सरकारले निश्चित प्रकार तोकेको भएपनि कतिपय अवस्थामा मन्त्रिपरिषदले पटके निर्णयका आधारमा यसअघि कतिपय नेताहरूलाई पनि राजकीय सम्मान दिइएको छ।
विशेष गरी जनआन्दोलनका सर्वोच्च कमाण्डर गणेशमान सिंहको निधनमा तत्कालिन सरकारले विशेष निर्णय गर्दै सरकारका मन्त्रीहरू सबै सिंहको निवासदेखि विष्णुमतिसम्म शवयात्रामा सहभागी भएका थिए।
यसरी राजकीय सम्मान पाउनेहरूको सूचीमा पूर्वप्रधानमन्त्रीहरू मनमोहन अधिकारी, गिरिजाप्रसाद कोइराला र कृष्णप्रसाद भट्टराई पर्दछन्। त्यस अलवा रामाराजाप्रसाद सिंहको निधनमा ०६८ सालमा तत्कालिन बाबुराम भट्टराई नेतृत्वको सरकारले सिंहलाई पनि राजकीय सम्मान दिएको थियो भने ०७० सालमा खिलराज रेग्मी नेतृत्वको सरकारले पञ्चायतकालका अन्तिम प्रधानमन्त्री मरिचमान सिंहलाई भने राजकीय सम्मान दिएको थिएन।