राष्ट्रिय पुनर्निमाण प्राधिकरणका प्रमुख कार्यकारी अधिकृत सुशील ज्ञवालीले पुनर्निमाणको कामका कुनै किसिमको अवरोध आउन नदिन निर्णय प्रक्रिया छिटो छरितो गर्ने गरी कार्यविधि बनाउने काम भइरहेको बताएका छन्।
राष्ट्रिय उद्योग व्यापार महासंघले शनिबार काठमाडांैमा गरेको कार्यक्रममा प्राधिकरणका प्रमुख कार्यकारी अधिकृत ज्ञवालीले भुकम्प गएको १० महिना बित्दा पनि विविध कारणले पुनर्निमाणको काम सुरु नभएको भन्दै प्राधिकरणले काममा सुस्तता आउन नदिन छिटोछरितो निर्णय गर्ने गरी कार्यविधि बनाइरहेको बताए। उनले कार्यविधि बनाउने काम अन्तिम चरणमा पुगेको भन्दै कार्यविधि बनिसके लगत्तै पुनर्निमाणको कामले तिब्रता पाउने बताए।
प्राधिकरणले भुकम्प सुरक्षा दिवसको अवसर पारेर माघ २ गते पुनर्निमाण महाअभियान सुरु गरेपनि भुकम्प प्रभावित वस्तीहरुमा पुनर्निमाणको काम सुरु हुन सकेको छैन। प्राधिकरणका प्रमुख कार्यकारी अधिकृत ज्ञवालीले प्राधिकरणले पुनर्निमाणका लागि प्रभावित वस्तीहरुमा पुगेर तथ्यांक संकलन गर्ने काम गरिरहेको भन्दै तथ्यांक संकलनको काम सकिनेवित्तिकै निर्माणको काम थाल्ने बताए। उनले पुनर्निमाणको काममा ठूलो मात्रामा निर्माण सामाग्री चाहिने भन्दै सबै स्थानमा सुपथ मूल्यमा निर्माण सामाग्री उपलब्ध गराउन व्यवसायीहरुसँग आग्रह गरे।