प्रहरी अधिकृत तथा कर्मचारी भ्रष्टाचार गर्दा गर्दै रंगे हात पक्राउ पर्न थालेपछि नेपाल प्रहरीका महानिरीक्षक उपेन्द्रकान्त अर्यालले उपत्यकाका ३ वटा प्रहरी परिसर, वृत्त र प्रभागका प्रमुखहरुलाई शुक्रबार कडा निर्देशन दिएका छन्।
प्रहरी प्रधान कार्यालयमै बोलाएर अर्यालले पछिल्लो समय प्रहरी संगठन बदनाम भएको भन्दै त्यसलाई रोक्न प्रहरी अधिकृत तथा कर्मचारी कसैको प्रलोभनमा पर्न नहुने धारणा राखेका छन्। निकै आक्रोशित मुद्रामा प्रस्तुत भएका प्रहरी महानिरीक्षक अर्यालले सबै प्रहरीलाई दायित्व र कर्तब्य तोकेको र त्यसबाट कोही पनि बिचलित हुन नहुने बताए।
'प्रहरीमा चेन अफ कमाण्ड छ, एक जनाले गल्ती गर्यो भन्दैमा सुपरभाइजर पछिन्ने कुरा आउँदैन, उसले पनि घटनाको जिम्मेवारी लिनुपर्छ' अर्यालले भने, 'आजैबाट सुपरभाइजरलाई पनि कारबाही हुन्छ, यसको परिणाम केही दिनमा देखिन्छ।'
प्रहरी पोशाकले मान प्रतिष्ठा र इज्जत दिएको भन्दै अर्यालले त्यसको नाममा संगठन नै बन्द गराउन नहुने बताएको एक प्रहरी अधिकारीले बताए । उपत्यका राजधानी भएकोले यहाँको पोलिसिङ अरुलाई देखाउने खालको हुनुपर्ने अर्यालले बताएका थिए। तर उपत्यकाकै प्रहरी अधिकृत स्ट्रिङ अपरेशनमा कारबाहीमा परेको भन्दै अर्यालले त्यो सैह्य नहुने धारणा राखेका थिए। '
'संगठन बदनाम गर्नेहरुलाई मेकानिजम बनाएर कठोर निर्णय चाल्छु' अर्यालले भने 'परिणाम केही दिनमै निस्किन्छ।' विफ्रिङमा कार्य विभाग र अनुसन्धान विभागका एआइजीहरुको पनि उपस्थिति रहेको थियो।
पछिल्लाे समय अख्तियारको फन्दामा को-को प्रहरी अधिकृत परे
गत वर्ष पुस ९ गते राजधानीको मीनभवनस्थित उक्त जग्गाबाट जग्गाधनीलाई हटाउन ५० हजार रुपैयाँ घुस लिएको आरोपमा अख्तियार टोलीले महानगरीय प्रहरी वृत्त बानेश्वरका प्रहरी प्रमुख डिएसपी रमेश तामाङलाई नयाँबानेश्वरबाट पक्राउ गरेको थियो।
गत साउन १२ गते कवाडी व्यवसायीसँग ३५ हजार घुस लिँदालिँदै महानगरीय प्रहरी वृत्त थानकोटका प्रहरी नायव उपरीक्षक डिएसपी तेजेन्द्र पौडेललाई अख्तियार दुरूपयोग अनुसन्धान आयोगको टोलीले घटनास्थलबाटै पक्राउ गरेको थियो ।
गत असार १ गते महानगरीय प्रहरी बृत्त स्वयम्भुका प्रहरी निरीक्षक पदमराज जोशीलाई अख्तियार दुरुपयोग अनुसन्धान आयोगले पक्राउ गरेको थियो। फरार आरोपीसँग एक लाख रुपैयाँ बार्गेनिङ गरेको सूचनाको आधारमा अख्तियारले जोशीलाई होटल बज्रबाट नगद सहित पक्राउ गरेको हो।
यही पुस १८ गते ललितपुरका डिएसपी दयानिधी ज्ञवाली, प्रहरी निरीक्षक रमेशबहादुर सिंह र सइ लालमणि पाण्डे पनि ४ लाख ५० हजारसहित पक्राउ परे।