भूकम्पमा परी घाइते भएकाहरुको उद्धारका लागि खटिएको अमेरिकी मरिन हेलिकप्टर दुर्घटनामा मृत्यु हुनेहरुका पीडित दोलखाली परिवारका आफन्तले आठ महिना पुगिसक्दा पनि बिमा रकम पाउन सकेका छैनन् ।
घाइते लिएर उडेको हेलिकप्टर जेठ ६ गते दोलखाको कालिञ्चोक गाविसमा दुर्घटना हुँदा लामिडाँडा–६ का ५० वर्षीया सावित्री शिवाकोटी खड्का, लादुक–७ का ५० वर्षीय ओमबहादुर खत्री, ५८ वर्षीय शिव खत्री, ३० वर्षीय ध्रुव केसी कटुवाल र ५८ वर्षीय लोकबहादुर केसी कटुवालको मृत्यु भएको प्रहरीले जनाएको छ ।
हेलिकप्टर दुर्घटनाका बखत हुने तेस्रो पक्ष बिमाअन्तर्गतका दोलखाली भूकम्पपीडित पाँच परिवारले अझै बिमाबापतको रकम पाउन सकेका छैनन् । अमेरिकी दूतावासले माग गरेको सम्पूर्ण कागजात बुझाएको तर पाँच महिना बितिसक्दासमेत कुनै पनि प्रकारको भुक्तानी नपाएको बुबा गुमाएका लादुक–७ चित्रेका २८ वर्षीय पीडित वासुदेव खत्रीले बताए।
अमेरिकी बिमा रकम प्राप्तिका लागि पीडितले गत भदौ १८ गते महाराजगञ्ज प्रहरी वृत्तको शव सद्गत पुर्जी, प्रहरी मुचुल्का, गाविसको सिफारिसपत्र, मञ्जुरीनामा र बैंक खाता नम्बरसमेत बुझाइसकेको भए पनि दूतावासले अझै बेवास्ता गरिरहेको पीडितको आरोप छ । श्रीमान् गुमाएकी लादुक–७ की ४२ वर्षीया चन्द्रकुमारी खत्रीले धेरै पटक धाइसकेको तर कुनै रकम पनि नपाएको दुखेसो पोखिन्। करिब नौ पटक धाइसकेकी खत्रीले भनिन्, “प्रत्येक पटक कम्तीमा दुई हजार नगद खर्च हुन्छ ।” पाउँछ भनेर विश्वास गरेर थुप्रै पटक जिल्ला कार्यालय धाएको भएपनि केही टुङ्गो नभएको छोरा गुमाएका लादुक–७ का ६५ वर्षीय भोगेन्द्रबहादुर कटुवालले बताइन्।
अमेरिकी सहचारीले केही ढिला हुने भनेकाले ढिलाइ भएको हुन सक्ने अनुमान दोलखाका प्रमुख जिल्ला अधिकारी देवेन्द्र लामिछानको छ। प्रजिअ लामिछाने भन्छन्, “दूतावासले मागेअनुसार मृतकको परिवारले उपलब्ध गराएको सबै कागजात पठाइएका छौंँ । दूतावासका सहचारीले रकम आउन केही ढिला हुने बताएका थिए । त्यसैले ढिला भएको हुन सक्छ । अब चाँडै रकम आउछ होला ।”
हेलिकप्टरमा सँगै दुर्घटनामा परेका नेपाली सेनाका क्याप्टेन टपेन्द्र रावल र जमादार वसन्त तितराका परिवारले भने मरणोपरान्त एक÷एक पद बढुवा पाई सम्पूर्ण राहत पाइसकेका छन्। रासस
