अपराध महाशाखामा बरामद गरि राखिएको इन्धन।
भारतीय नाकाबन्दीसँगै उपत्यकामा इन्धन कालोबजारी गर्नेहरुविरुद्ध काठमाडौं, ललितपुर प्रहरीको साथै महानगरीय प्रहरी अपराध महाशाखाले आक्रामक अप्रेसन सुरु गरेका छन्।
उनीहरुले अहिलेसम्म २७ हजार लिटर भन्दा बढी डिजेल, १७ हजार भन्दा बढी लिटर पेट्रोल बरामद गरिएको प्रहरीले जनाएको साथै प्रहरीले मट्टितेल र ग्याससमेत बरामद गरेको प्रहरीले जनाएको छ । उनीहरुले सय भन्दा बढीलाई नियन्त्रणमा लिएर मुद्दा चलाएका छन् ।
राजधानी भित्रने यात्रुबहाक बस र मालबहाक ट्रकमा अवैध रुपमा इन्धन भित्रने क्रम बढेको छ । साथै तोकिएको मूल्यभन्दा चौबर बढीमा बेचबिखन भएको र अप्रेसन शुरु गरिएको महानगरीय प्रहरी अपराध महाशाखाका एसएसपी सर्वेन्द्र खनालले बताए ।
उनले घरायसी प्रयोजनका लागि ल्याएको थोरै मात्राका इन्धन भने बरामद नगरिएको दाबी गरे । त्यस्तै काठमाडौं प्रहरीले पनि कालोबजारीका नाममा केहीले कमाउ धन्दा गरेपछि अप्रेसन शुरु गरेको बताएको छ ।
एसपी विश्वराज पोखरेलले इन्धन कालोबजारी बढ्दै गएपछि अप्रेसन सुरु गरिएको बताए । ललितपुरका डिएसपी दयानिधी ज्ञवालीले पनि इन्धन अभाव भएको बेला चर्को मूल्य लिएर बेच्नेहरुलाई नियन्त्रणमा लिइएको दाबी गरे ।
महानगरीय प्रहरी अपराध महाशाखाबाट बरामद
पेट्रोल ५ हजार ५ सय ४० लिटर
डिजेल ६ हजार ९ सय लिटर
पक्राउ २० जना
काठमाडौं प्रहरी परिसरबाट बरामद
डिजेल २० हजार ३ सय १० लिटर
पेट्रोल ११ हजार ९ सय १९ लिटर
मट्टितेल १५ सय लिटर
ग्यास ८९ वटा सिलिण्डर
पक्राउ ७१
ललितपुर प्रहरी परिसरबाट बरामद
पेट्रोल १२ सय लिटर
डिजेल १५ सय ३० लिटर
ग्यास १४ वटा
पक्राउ १९ जना
यसैगरी भक्तपुर प्रहरीले पनि कालोबजारी अन्तर्गत कारबाही चलाइरहेको बताएको छ। अहिलेसम्म २ वटा पेट्रोल पम्पका संचालकलाई पक्राउ गरिएको ठगीको मुद्दा दर्ता गरिएको डिएसपी शेखर खनालले जानकारी दिए ।
यसैगरी प्रहरीले पक्राउ परेका र बरामद भएको इन्धन जिल्ला अदालतमा बुझाउनुपर्ने प्रावधान छ। अदालतलाई पनि इन्धन व्यवस्थापन गर्न निकै अप्ठेरो परेको छ । अति प्रज्वलनशिल पदार्थ भएका कारण स्टोर गरेर धेरै समय राख्न नहुने हुदाँ न्यायलयले त्यसको छिटो व्यवस्थापनमा ध्यान दिनुपर्ने सरोकारवाला निकायहरुको सुझाव छ।
नैकापका रन्जन श्रेष्ठको घरबाट बरमाद गरिएको २ हजार लिटर डिजेल । उनले खानेपानीको ट्यांकीमा डिजेल राखेर चर्को मूल्यमा बेच्ने गरेका थिए ।
यी बाहेक काठमाडौं उपत्यकामा रहेका १७ वटा पेट्रोल पम्पहरुमा प्रहरीले छापा मारेको थियो । उनीहरुले मेसिन बिगारी रिमोर्ट जडान गरि उपभोक्ता ठग्दै आएको प्रहरीले जनाएको छ । ७ जना पेट्रोल पम्प संचालक र ५ जना मेसिन जडान गर्ने मिस्त्रिहरुमाथि पनि ठगीको मुद्दा चलाइएको प्रहरीले जनाएको छ ।
प्रहरी प्रधान कार्यालय नक्सालले भने अहिलेसम्म १ सय २४ जना पक्राउ गरिएको जनाएको छ ।
