भारत मोतिहारी ढाका २ का ४४ वर्षीय नसिम सिद्धीकी २५ वर्ष अघि नेपाल आएका हुन्। उनको सतुङगलमा डिएम आयल स्टोर नामक पेट्राल पम्प छ। आफू भारतीय नागरिक भएको बताउने उनीसँग नेपाली नागरिकता पनि छ। उनले कसरी नागरिकता पाए त्यो अनुसन्धानको पाटो जारी नै रहेको प्रहरीले बताएको छ ।
प्रहरीका अनुसार उनी नै पेट्रोल पम्पहरुमा रिमोर्ट जडान गर्ने नाइके हुन्। उनले २५ वर्षदेखि पेट्रोल पम्पहरुमा मेसिन जडान गर्ने गरेको प्रहरीसमक्ष बयान दिएका छन्। २५ वर्षअघि नेपालमा डिजीटल पेट्रोल पम्प थिएन । सबै म्यानुअल नै थिए। उनले बिहारबाट नै आफन्त र साथीसंगी ल्याएर पम्पहरुमा कसरी मेसिन फिट गर्ने सिकाएका थिए।
'पहिले पहिले उनी एक्लै पम्पहरुमा मिटर बिगारी मेसिन जडान गर्दथे, पछि उनले आफन्त र साथीभाईलाई त्यो काम सिकाए,' महानगरीय प्रहरी अपराध महाशाखाका एसएसपी सर्वेन्द्र खनालले सेतोपाटीसँग भने । पछिल्लो समय उनको टिममा अयुव आलम, हमिद हुसेन,मोहम्मद अबरार र शेख इम्तिहाज थिए। उनीहरुलाई उनले सबै काम सिकाएका थिए।
पप्पु भनिने एसन आलम पनि उनीहरुकै टीमका हुन् । पछि छुट्टिएर त्यस्तै काममा लागेका उनी अहिले फरार छन्। उनीहरु आफैँ पम्प संचालकहरुसमक्ष गएर मेसिन फिट गर्ने प्रस्ताव गर्ने गरेको एसएसपी खनालले बताए। अयुव बाहेक सबैले म्यानुअल पम्पहरुमा मेसिन जडान गर्दथे। अयुव भने इलेक्टिसियनमा डिप्लोमा गरेका कारण अलि बाठो थिए।
उनले डिजीटल पम्पमा मात्र पल्सर कार्ड फिट गर्दथे। एउटा पेट्रोल पम्पमा मेसिन जडान गरिदिएबापत उनीहरुले ३० हजार रुपैयाँसम्म लिने गरेको डिएसपी रमेश थापाले जानकारी दिए। १० वर्षयतामात्र काठमाडौंमा डिजीटल पेट्रोल पम्प खुलेको र त्यसपछि उनीहरु अल्लि सक्रिय रहेको डिएसपी थापाले बताए।
प्रहरीका अनुसार उपत्यका बाहिर पनि यस्तै काम गर्ने गिरोह सक्रिय छ। पम्पहरुमा मेसिन फिट गर्न जम्मा आधा घन्टा समय लाग्ने उनीहरुले बताएको डिएसपी नरेन्द्र चन्दले बताए। राजधानीमा १ सय २५ वटा पेट्रोल पम्प छन् । सरकारीबाहेक ९५ प्रतिशतले मेसिन जडान गरेको प्रहरीको दाबी छ।
वाणिज्य विभाग, नापतौल तथा गुणस्तर र आयल निगमले पम्पहरुमा चेकजाँचमा ध्यान दिनुपर्ने हो तर दिएनन् एसएसपी खनालले भने। उनीहरुकै मिलेमतोमा पम्प संचालकहरुले उपभोक्ता ठगी गर्ने गरेको प्रहरीको दाबी छ। प्रहरीले पम्प संचालकहरुको बैंक ब्यालेन्स र कहाँकहाँ कनेक्सन छ त्यसबारे पनि अनुसन्धान गरिरहेको छ।