सहकर्मी प्रहरी जवान रेशम थापाको हत्यामा संलग्न अशोक बरालले तत्कालको रिसले हत्या भएको प्रहरीको प्रारम्भिक अनुमान रहेको छ। बरालले बयानमा मार्नुपर्ने खास कारण नभएका बताउँदै आएका र उनीहरू दुई असाध्यै मिल्ने साथी भएकाले ‘तातो’ रिसमा थापा परेको हुन सक्ने पाइएको प्रारम्भीक अनुसन्धानले देखाएको हो।
घटनाभएलगत्तै फरार भएर २२ घण्टापछि पक्राउ परेका बरालसँग पटक–पटक बयान लिए पनि घटनाको कारण अझै खुल्न सकेको छैन। उनले अनुसन्धानका क्रममा आफूमा भएको रिसइवी नखुलाएकाले तत्कालको रिसमा उनले सहकर्मीको हत्या गरेको हुन सक्ने प्रहरी स्रोत बताउँछ। प्रहरी संगठन भित्र र स्थानीयकाअनुसार उनीहरु दुई मिल्ने साथी भएकाले त्यति बेलै भएको ‘कुनै कारण'ले बराल हत्या गर्नसम्म पुगेको प्रहरीको अनुमान छ।
अनुसन्धानका क्रममा बरालले आफूलाई पश्चात्ताप भएको बताएका छन्। उनले बयानमा बन्दुकमा गोली कस्ले राख्यो भन्नेमासमेत आफू अनविज्ञ रहेको दाबी गर्दै आएका छन्। प्रहरी स्रोतअनुसार ठोकर्पा प्रहरी चौकीमा दिउँसो बस्ने सेन्ट्रीले बन्दुक बोक्दैनथे। अघिल्लो रातदेखि घटना भएको दिन अशोकको हातमा बन्दुक परुञ्जेल दिउँसो ड्युटीमा बस्ने कसैले हतियार बुझेका थिएनन्। अघिल्लो दिन पनि बरालले नै हतियार बोक्ने ड्युटी गरेका थिए। अघिल्लो दिन पनि उनैको ड्युटी रहेकाले बन्दुकमा गोली कस्ले भर्यो भन्नु बरालको मुर्खता देखिन्छ। यो घटनाक्रमले पनि कुनै रिसइवी भएकाले उनले रेशमको हत्या योजनाअनुसार नै भएको पुष्टि गर्छ।
‘कुनै त्यस्तो रिसइवी हुनसक्छ, जुन अझैसम्म बरालले भनेका छैनन्,' जिल्ला प्रहरी कार्यालयका इन्सपेक्टर अनुसन्धान अधिकृत रुपक खड्का भन्छन्, ‘रिसइवी नभएको भए गोली हानेरै आफ्नो मिल्ने साथीको हत्यासम्म कोही पुग्न सक्दैनन्।' खड्काले ड्युटी बसेको प्रहरीद्वारा सहकर्मीलाई गोली हान्नु ठूलो लापरवाही भएको बताउँदै तथ्य कारण पहिल्याउन अनुसन्धान जारी रहेको बताए।
गोली हान्नका लागि धेरै प्रक्रिया पार गर्नुपर्ने र अघिल्लो हतियार ड्युटी बरालकै भएकाले केही कारण हुनसक्ने प्रहरीको भनाई छ। ‘रातको समयमा घटना भएकाले अनुसन्धानमा थप समस्या आएको छ,' इन्सपेक्टर रुपक भन्छन्, ‘चौकीका अन्य प्रहरी र स्थानीय सबै सुतिसकेको समय भएकाले देख्ने व्यक्ति कोही नहुँदा कठिनाई उत्पन्न भएको हो।' उनले उनीहरुबीच केही भनाभनसमेत भएको सुन्ने कोही नभएको र बरालले गोली हान्नुको खास कारण नभन्दा वास्तविक कुरा बाहिर आउन ढिला भएको बताए।
अनुसन्धानका क्रममा प्रहरी सबैतिर क्रस चेक गरेको छ। कतैबाट पनि घटनाको यथार्थबारे पत्ता नलागेको प्रहरीको भनाई छ। उनीहरु दुवैको मोबाइल ‘कल डिटेल्स'बाट पनि घटनाको कारण खुल्न सकेको छैन। उनीहरुले मोबाइलमा कुराकानी गरेको नम्बरसँग एक आपसमा कुनै सम्बन्ध नरहेको प्रहरीको दाबी छ।
प्रहरीले घटना हुने बेलामा प्रयोग भएको हतियार र बरालको कपडा जाँचका लागि पठाएको छ। गोलीको खोका, बरालले घटना हुने बेलामा लगाएको बर्दी, बन्दुक जिल्ला प्रहरी कार्यालयले केन्द्रीय प्रहरी विधिविज्ञान प्रयोगशालामा पठाएको हो। त्यहाँबाट रिपोर्ट आउन बाँकी छ। बरालले नै हानेको भए प्रमाणितसहित रिपोर्ट आउने भएकाले प्रहरीले घटनामा प्रयोग भएका सबै सामग्री विधिविज्ञान पुर्याएको हो। बन्दुक पड्केपछि गोली हान्नेको कपडामा, बन्दुकमा र खोकामा बारुद हुन्छ। तीनै ठाउँमा एकै किसिमको बारुद हुने भएकाले बरालको बर्दीमा सोही बारुद भेटिए बन्दुक उनैले हानेको प्रमाणित हुन्छ। बरालले पछि ‘मैले बन्दुक हानेको हैन' भनेर नपन्छिउन भन्नैका लागि सबै सामग्री विधिविज्ञान पठाइएको प्रहरीले जनाएको छ।
सहकर्मीलाई गोली हान्ने बरालबाट तत्कालका लागि घटनाको कारण नखुलेपछि अन्य स्रोत लगाइ राखिएको जिल्ला प्रहरी प्रमुख डिएसपी विश्व अधिकारी बताउँछन्। ‘अशोकले दिएको बयान कुनै पनि दृष्टिकोणबाट मिल्दैन,' उनले भने, ‘गोली आफै कहिल्यै पड्किदैन, उनले आफूले जानी जानी गोली नपड्काएको दाबी गर्दै आएका छन्।' उनले अझै स्थानीय र अन्यसँग ‘क्रस चेक' गरिरहेकाले छिट्टै घटनाको यथार्थ आउने विश्वास दिलाए।
दुई साताअघिको सोमबार राति ठोकर्पा प्रहरी चौकीमा घटना भएपछि बराल बन्दुक छाडेर भागेका थिए। उनले जंगलमै रात बिताएका थिए। भोलिपल्ट साँझ उनी लुकीछिपी घरमा आएपछि प्रहरीले पक्राउ गरेको थियो। पक्राउ परेदेखि नै उनीसँग बयान लिइँदै आएको प्रहरीले जनाएको छ।