गुल्मीको रेसुङगा नगरपालिका वडा नं. १४ दुविचौरमा सोमबार दिउँसो भएको बस दुर्घटनामा परि ४ वर्षिय बालिकासहित ५ जनाको मृत्यु भएको छ।
बिहान ८ बजे गुल्मीको तम्घासको लागि छुटेको लु. १ ख. ४१६१ नं. को यात्रु वाहक बस दिउँसो करिब २ बजे दुर्घटनामा परेको थियो।
दुर्घटनामा चालकसहित २४ जना घाईते भएको प्रहरीले जनाएको छ। बस दुर्घटनामा परि रेसुङगा नगरपालिकाका ४ जनाको मृत्यु भएको छ। दुर्घटनामा परि रेसुङगा १५ का ४८ वर्षिय तामबहादुर सुनार, रेसुङगा ६ का ५५ वर्षिय रोहित मरासिनी, रेसुङगा ८ का २५ वर्षिय करन चुदारा, रेसुङगा १५ का ४६ वर्षिय भीम कुमारी श्रीसको मृत्यु भएको छ।
त्यसैगरी गुल्मीकै अर्लाङकोट गाविस ६ की ४ वर्षिय सिजन परियारको पनि सोहि दुर्घटनामा मृत्यु भएको जिल्ला ट्राफिक प्रहरी कार्यालय गुल्मीका प्रहरी नायब निरीक्षक प्रेम श्रेष्ठले जानकारी दिए।
३२ जना यात्रु लिएर बिहान ८ बजे बुटवलबाट तम्घासको लागि छुटेको उक्त बसले रिडीमा गएर थप यात्रु चढाएको प्रहरीले जनाएको छ।
प्रत्यक्षदर्शी र घाईतेका अनुसार बस अत्यन्त तिव्र गतीमा रहेको कारण दुर्घटनामा परेको अनुमान गरिएपनि दुर्घटना हुनुको कारणबारे अनुसन्धान भईरहेको प्रहरीले जनाएको छ।
स्थानीयस्तरमा चल्ने जिपहरुले लोकल यात्रुहरुलाई नचढाउने गरेका कारण बुटवलबाट कम यात्रु लिएर गएको उक्त बसमा यात्रुहरु चढेको प्रहरीले जनाएको छ।
बस दुर्घटनामा परेको थाहा पाएपछि जिल्ला प्रहरी कार्यालय तम्घास, जिल्ला ट्राफिक प्रहरी कार्यालयबाट गएका सुरक्षाकर्मी र स्थानीयवाशीले घाईते र मृतकको उद्धार गरेका थिए।
घाईते मध्ये टाउको र छातिमा चोट लागेका १० जनालाई थप उपचारको लागि पाल्पा पठाईएको र अन्य १४ जनाको जिल्ला अस्पताल तम्घासमा उपचार भईरहेको प्रनानि श्रेष्ठले जानकारी दिए।
पाँच मिनेटको समयमा तम्घास पुग्नै लाग्दा बस दुर्घटनामा परेपछि घाईते तथा मृतकहरुको उद्धार गर्न सहज भएको थियो। बस सडकबाट ७० मिटर तल भिरमा रुखमा अड्किएको प्रहरीले जनाएको छ।
बसका चालक पाल्पाका ३५ वर्षिय श्रीधर पाण्डेपनि घाईते रहेको र उनको तम्घासमा उपचार भईरहेको प्रहरीले जनाएको छ।