सहकर्मी प्रहरी जवान रेशम थापाको हत्यामा संलग्न अशोक बराल पक्राउ परेको डेढ साता बितिसक्दा समेत घटनाको कारण अझै खुल्न सकेको छैन। अभियुक्तसँग पटक पटक बयान लिए पनि घटना अझै रहस्यमै रहेको हो।
प्रारम्भिक बयानमा सहकर्मीको हत्या गर्ने प्रहरी जवान बरालले आफूले बोकेको थ्री नट थ्री बन्दुक त्यत्तिकै पड्किएको बताएका छन्। बरालले सहकर्मी रेशमलाई आफूले हत्या जानी जानी नगरेको बताउँदै आएको जिल्ला प्रहरी कार्यालयले जनाएको छ।
सहकर्मीलाई मार्नै पर्ने त्यस्तो केही विशेष कारण नभएको बरालसँग लिएको बयानलाई उदृत गर्दै जिल्ला प्रहरी प्रमुख डिएसपी विश्व अधिकारीले बताए। बरालले दिएको बयानअनुसार उनले घटना हुने बेलामा दाँयापट्टी लिनुपर्ने बन्दुक बायाँतिर लिएका थिए। त्यतिबेला रेशम प्रहरी चौकीको कोठा भित्र थिए। बरालले ढोका खोल्न खोज्दा अकस्मात बन्दुक पड्किएर रेशमलाई लागेको दावी गर्दै आएका छन्।
अन्य सहकर्मी प्रहरी र स्थानीयकाअनुसार थापा र बराल मिल्ने साथी हुन्। बयानमा पनि बरालले रेशम आफ्नो सबैभन्दा मिल्ने साथी भएको बताउँदै आएका छन्। सबै भन्दा घनिष्ठ साथीलाई कसरी हत्या गर्नसम्म अशोक पुगे भन्ने अझै रहस्यमै रहेको प्रहरीको भनाई छ।
सामान्य अवस्थामा सेन्ट्री बसेका प्रहरीले बन्दुकमा म्यागजिन(गोली) भरेका हुँदैनन्। थ्री नट थ्री बन्दुकमा गोली ‘लोड' गरेर ‘सुट' गर्न केही समय लाग्दछ। गोली लोड गरेको बन्दुक पनि ‘लक' हुने गर्दछ। गोली हान्नु अगाडिको अवस्थामा ‘कक' गर्नुपर्ने हुन्छ। ‘सुट' गर्नैका लागि बन्दुकमा गोली भरेर ‘लक' अन गरि ‘कक' गरेर स्वीच दबाएपछि मात्रै गोली पड्कन्छ। यस्त्ाो हुँदा र घटनाको प्रकृति हेर्दा सहकर्मीलाई बरालले योजनाअनुसार नै हत्या गरेको देखिन्छ।
प्रहरी अनुसन्धानमा बरालले आफै पड्किएको दाबी गरिरहेका छन्। बन्दुक लिएर ड्युटी बस्दा प्रहरीले आफ्नो हतियारको अवस्थाबारे थाहा पाउनु जरुरी हुन्छ। ‘यो ठूलो लापरवाही हो,' प्रहरी प्रमुख डिएसपी अधिकारी भन्छन्, ‘गोली हान्नका लागि विभिन्न चरणहरु पार गर्नुपर्ने हुन्छ।' त्यत्तिकै गोली पड्किएको भन्ने बरालको बयानमा आफू सन्तुष्ट नभएको उनले बताए। डिएसपी अधिकारी आफूहरु घटनाको कारणबारे अनुसन्धानमा रहेको बताउँछन्।
घटनाको कारण पत्ता लगाउन प्रहरीले अनुसन्धान गरिरहेको छ। ठोकर्पा प्रहरी चौकीमा कार्यरत प्रहरीसँग बुझिसकिएको प्रहरीले जनाएको छ। ‘घटनाबारे यथार्थ पत्ता लगाउन हामीले विभिन्न व्यक्तिहरुसँग ‘क्रस चेक' गरिरहेका छौं,' डिएसपी विश्व भन्छन्, ‘स्थानीयसँग पनि यसबारे जानकारी लिइरहेका छौैं।' उनले घटना हुने बेलामा नजिकै कोही नभएको र देख्ने व्यक्ति नहुँदा अनुसन्धानमा केही समस्या आएको बताए।
ड्युटीमा रेहको बेला आफूले बुझेको बन्दुकबाट सहकर्मी मारिएपछि बराल दोषी ठहरिए। ‘बराल दोषी हुन् भन्नेमा निर्विवाद छ,' डीएसपी अधिकारी भन्छन्, ‘घटनाको कारणबारे अनुसन्धान जारी छ।' बराललाई अनुसन्धानका लागि म्याद थप गरिएको छ। उनलाई कर्तव्य ज्यान मुद्धा चलाइएको प्रहरीले जनाएको छ।
यसरी पक्राउ परे बराल
सोमबार राति ठोकर्पा प्रहरी चौकीमा घटना भएपछि बराल बन्दुक छाडेर भागे। आफूले बोकेको बन्दुकको गोलीले सहकर्मी रेशम थापा ढलेपछि उनी अत्तालिएका थिए। चौकीका अन्य प्रहरीहरु गोली पड्केको आवाज सुनेपछि तुरुन्तै आएका थिए। त्यतिबेला बराल आफ्नो मिल्ने साथी रेशम ढलेपछि ‘सरी–सरी' भनिरहेका थिए। चौकीका अन्य प्रहरी घटना भएको स्थानमा आएपछि बराल बन्दुक छाडेर भागेको प्रहरीहरुको भनाई छ।
सहकर्मीलाई गोलाी हानेर फरार भएका बराल सोही दिन राति जंगलमै बसेका थिए। पक्राउ पर्दा उनको शरिरमा जुकाले टोकेका डामहरु शरिरभर थिए। प्रहरीकाअनुसार उनले जंगलमै रात बिताएका थिए।
एक रात कष्टसँग जंगलमा बिताएपछि उनी भोलिपल्ट बिहान आफ्नो घर देखिने ठाउँम्ाा आएका थिए। भोलिपल्ट साँझसम्म आफ्नो घर भन्दा पारीपट्टीको जंगलमा रहेको सानो ओडारमा बसेका थिए। उनले त्यही ओडारबाट आफ्नो घरमा भएको चहलपहल नियालेका थिए। घरमा दिउँसो युनिफर्मका ड्युटीवाला प्रहरी देखेपछि उनी हच्किएका थिए। आफू पनि प्रहरी ड्रेसमै भएकाले बराललाई कतै जानका लागि कठिन थियो। उनको घर आसपास सिभिलमा प्रहरीले निगरानी राखिरहेको थियो।
बरालको कतै पत्ता नलागेपछि युनिफर्ममा रहेका प्रहरी टोली दिउँसो ३ बजे फर्किएका थिए। सिभिलका प्रहरी भने त्यतै थिए। बरालले आफ्नो घरबाट प्रहरी फर्किएको पारी जंगलको ओडारबाट नियालिरहेका थिए।
साँझ पर्दै थियो। सिभिलमा रहेका प्रहरीहरु बराल आउने आशमा गाउँमै थिए। नभन्दै बराल तल खोलाबाट आए। अनि आफ्नो घरभित्र छिरे। उनी आएको हेरिरहेका प्रहरीले बराल घरभित्र पसेपछि पक्राउ गरेका थिए। त्यसपछि जिल्ला प्रहरी कार्यालयबाट सवारी साधन गएपछि उनलाई चौतारा ल्याइएको थियो।
