पूर्णबहादुर आलेको मृत्युको अनुसन्धान गर्न माग गर्दै शुक्रवार साँझ भएको आन्दोलनमा प्रहरीको गोली लागी एक युवकको मृत्यु भएपछि आन्दोलनकारीले शनिबार दिउँसो ३ बजेदेखि पृथ्वीराजमार्ग अवरुद्ध गरेका छन् ।
प्रहरीको गोली लागी व्यासनगरपालिका–१ भादगाउँ निवासी १८ वर्षीय रोशन दुराको शुक्रवार मृत्यु भएपछि आक्रोशित बनेका आन्दोलनकारीले राजमार्ग अवरुद्ध गरेका हुन् । आन्दोलनकारीले पृथ्वीराजमार्गअन्तर्गत ट्राफिक चोकमा टायर बालेर अवरुद्ध गरेपछि कुनै पनि सवारीसाधन चल्न सकेका छैनन् । उनीहरुले गोली चलाउने प्रहरीलाई कारबाहीको माग गर्दै राजमार्ग अवरुद्ध गरेको बताइएको छ।
जानकारी बिना नै यातायातका सवारीसाधन अवरुद्ध हुँदा हजारौँ यात्रु अलपत्र परेका छन् । मृतक दुराको शव पोखराबाट दमौली ल्याउन लागिएको खबरसँगै दमौली बजारमा मानिसको भीड लागेको छ । अवरुद्ध राजमार्ग खुलाउन पहल भइरहेको तनहुँका प्रहरी प्रमुख प्रहरी उपरीक्षक मोहनकुमार आचार्यले जानकारी दिए। रासस
