धुवाँले निसास्सिएर पूर्वी इलामको एकै गाउँमा तीन जनाको मृत्यु भएको छ। इलामको श्रीअन्तु गाविस वडा नम्बर ६– स्थित श्रीबुङको एक घरमा तीन जनाको ज्यान गएको हो। मृत्यु हुनेमा श्रीअन्तु–६ का ४५ वर्षीय लगन तामाङ्ग, १८ वर्षीय निकेश मगर र पशुपतिनगर–२ का ६९ वर्षीय फूर्वा लामा छन्। विद्युत सेवा नपुगेको उक्त ठाउँमा बिजुली बाल्नका लागि जेनेरेटरको प्रयोग गरिएको थियो।
प्रहरीका अनुसार कोठाको भेन्टिलेसन नखोलिकन सुतेका उनीहरु शनिबार विहान अबेरसम्म नउठेपछि आफन्तले हेर्दा तिनै जनालाई बेहोस् अवस्थामा फेला पारेका थिए। उपचारका लागि फिक्कल हस्पिटल र फिक्कलमै रहेको प्रसिद्ध हस्पिटलमा उपचारको क्रममा उनीहरुको निधन भएको परिवारले बताएको छ । मृतक तिनैजनाको शवलाई फिक्कल स्वास्थ्य संस्थामा पोष्टमार्टमपछि परिवारको जिम्मा लगाइएको इलाका प्रहरी कार्यालय पशुपतिनगरका प्रहरी निरीक्षक पदम थपलियाले बताए।