बर्खे बिदा हुँदा घर गएका शिक्षकहरु लगातारको मधेस बन्द र आन्दोलनका कारण विद्यालयमा फर्कन नसक्दा विकट हिमाली जिल्ला मुगुका विद्यालयमा अझै पढाइ हुन सकिरहेको छैन।
गत असार १५ देखि साउन १५ सम्म बर्खे बिदा भएर साउन १६ गतेदेखि विद्यालय खुले पनि मधेसमा रहेका विभिन्न जिल्लामा स्थायी बसोबास भएका शिक्षक विभिन्न समूह, पार्टी र सङ्घसंस्थाले गरेको बन्द र आन्दोलनको चपेटामा परी समयमै विद्यालय फर्कन नसक्दा उनीहरु कार्यरत विद्यालयमा बिदा सकिएको एक महिनाभन्दा बढी भइसक्दा पनि पढाइ हुन नसकेका हो।
जिल्लाको उत्तरी भेगमा पर्ने सोरु भेगका नाथुर्पु, भिई, जिमा, कालै र धैनकोट गाविसमा रहेका विद्यालयमा कार्यरत मधेसमा बसोबास रहेका शिक्षक विद्यालय नआउँदा यो भेगका तीन दर्जन विद्यालयमा पढाइ हुन सकेको छैन।
मुगु जिल्लाका चार भेगमध्ये करान, गम र खत्याड भेगका विद्यालय गत साउन महिनाको १६ गतेदेखि खुलेर कक्षा सञ्चालन भइरहे पनि सोरु भेगका तीन दर्जन विद्यालयमध्ये सात माध्यमिक, चार निम्न माध्यमिक र बाँकी प्राथमिक विद्यालयका शिक्षक अहिलेसम्म आफ्नो विद्यालयमा नआउँदा पाँच हजारभन्दा बढी बालबालिका पढाइबाट वञ्चित हुन पुगेका छन्। चार भेगमध्ये यो भेगमा सबैभन्दा बढी मधेसमा रहेका जिल्लामा स्थायी बसोबास रहेका पहाडी तथा मधेसी मूलका शिक्षक कार्यरत रहेका छन् । सोरु भेगमा मात्रै चार दर्जन मधेसी मूलका शिक्षक कार्यरत छन्।
शिक्षक सङ्घ मुगुका अध्यक्ष जङ्गबहादुर शाही भन्छन् – साउन १५ गतेसम्म बिदा भए पनि त्यसयता मध्यपश्चिम र कर्णाली बन्दले यातायातका साधन चलेनन्। यी क्षेत्रमा बन्द खुलेलगत्तै मधेसका जिल्लामा आन्दोलन चर्किहाल्यो। शिक्षकहरु विद्यालयमा फर्कन आतुर भए पनि सकिरहेका छैनन्।
मुगु जिल्लामा सर्लाही, महोत्तरी, सप्तरी, सिराहा, बर्दिया, बाँके र चितवनका पहाडी तथा मधेसी मूलका शिक्षक बढी कार्यरत छन्।
प्रायः शिक्षक जिल्ला बाहिर भएका र स्थानीयवासी शिक्षक पनि बाहिर जिल्ला रहेकाहरुको सिको गर्दै विद्यालय नआउँदा विद्यालय नखोलिएको जनज्योति उच्च मावि व्यवस्थापनका अध्यक्ष मञ्जन शाही बताउछन्।
एक महिना बितिसक्दा पनि आआफ्ना विद्यालयमा नपुग्ने शिक्षकलाई स्पष्टीकरण सोधिने र चित्त बुझ्दो जवाफ नदिने शिक्षकलाई आवश्यक कारबाही गरिने निमित्त जिल्ला शिक्षा अधिकारी धनसुधन चौलागाईं बताउँछन्। उनका अनुसार सोरु भेगका सात गाविसका विद्यालयको दैनिक अनुगमन र निरीक्षण गर्न दुई स्रोत केन्द्र कालै र नार्थपुका स्रोत व्यक्तिलाई खटाइसकिएको छ। रासस
