ईलाका प्रहरी कार्यालय, मैनापोखरमा कार्यरत प्रहरी हवल्दारको शुक्रबार आन्दोलनकारीसँगको झडपमा मृत्यु भएको छ।
प्रहरी र आन्दोलनकारी बिच झडप हुँदा उनको मृत्यु भएको प्रहरीले बताएको छ। आन्दोलनकारीले चलाएको गोली प्रहरी हवल्दार देवबहादुर पान्डेलाई लागेको थियो। क्षेत्रिय प्रहरी कार्यालयका डिआईजी केशव प्रसाद अधिकारीका अनुसार आन्दोलनकारीले चलाएको गोलीले उनको मृत्यु भएको हो। उनका अनुसार घटनामा संलग्न तीन जनालाई प्रहरीले पक्राउ गरेको छ।
दाङ लालमटिया स्थायी घर भएर बाँकेमा परिवारसँग बस्दै आएका प्रहरी हवल्दार देवबहादुर पान्डेको नेपालगंजस्थित शिक्षण अस्पतालमा उपचारको क्रममा मृत्यु भएको हो।
स्कटिङ गरि बाँकेबाट आएको २ बटा बसलाई नेपालगंज–गुलरिया सडकखन्ड अर्न्तगत पर्ने मैनापोखरमा पुगेपछि गुलरियाबाट आएको प्रहरीको टोलीलाई बुझाएर मैनापोखरको टोली फर्कने क्रममा आन्दोलनकारीले गोली चलाएको डिआईजि अधिकारीले बताए।
उनका अनुसार ईलाका प्रहरी कार्यालय मैनापोखरको चो देखि २ सय मिटर पश्चिममा आन्दोलनकारी र प्रहरीबीच झडप कै समयमा मकैबारीमा लुकेर गोली प्रहार गरी प्रहरी हवल्दार पान्डेलाई घाईते बनाए। ‘गोलीले दायाँ खुट्टाको तिघ्राबाटबाट छिरेर बाँया खुट्टासम्म छेडेको छ,’ अधिकारीले भने।
कन्चनपुरदेखि चितवनसम्म थरूहट भूमि स्वायत्त प्रदेशको माग गर्दै संयुत्त संघर्ष समिति बन्दको आह्वान गरेको हो।
थरुहट थारुवान सयुक्त संघर्ष समितिका संयोजक गोबिन्द थारुले भने, ‘हाम्रो पक्षले गोली चलाएको छैन’, उनले थपे ‘थारूको आन्दोलनमा रहेका सबै आन्दोलनकारी निशस्त्र थिए।’
‘गोली लागेको हो भने प्रहरीले कस्तो हतियारबाट गोली चलेको हो त्यो पनि खुलाउनु पर्छ,’ उनले भने।
थारूको घरमा गएर प्रहरीले गरिरहेको दमनलाई सरकाले तुरुन्त रोक्नु पर्ने उनले वताए।
थरुहट राज्य माग गर्दे आह्वान गरेको बन्दको प्रर्दशनले जनजीवन कष्टकर बन्दै गएको छ।
बन्दको कारण अलपत्र परेका यात्रु गन्तव्यसम्म पुग्न समस्या भएको छ। लामो तथा छोटा दूरिका सार्वजनिक यातायात पूर्ण रुपमा ठप्प छन्।