बर्दियाको मैनापोखरमा बन्द आब्हानकर्ता र प्रहरीबीच भएको झडपमा गोली लागेर नेपाल प्रहरीका हवल्दार देबबहादुर पाण्डेको मृत्यु भएको छ। नेपालगन्जबाट सुरक्षाकर्मीको स्कर्टिङमा बर्दियाको गुलरिया तर्फ जादै गरेका दुईवटा रात्री बसलाई आन्दोलनकारीहरुले अबरोध गरी तोडफोड र आगजनीको प्रयास गरेपछि प्रहरी र आन्दोलनकारी बिच झडप भएको थियो।
सडक अबरोध गरेका आन्दोलनकारीहरुलाई हटाउन गएको प्रहरीमाथि मकैबारीमा लुकेका आन्दोलनकारीहरुले गोली प्रहार गर्दा प्रहरी हबल्दार पान्डेलाई लागेको एक प्रहरी अधिकृतले बताए।
स्थिति तनाबग्रस्त बन्दै गएपछि आन्दोलनकारीलाई नियन्त्रणमा लिन प्रहरीले केही सेल अश्रुग्यास प्रहार गरेको थियो। अश्रुग्यास प्रहारबाट पनि स्थिति नियन्त्रणमा नआएपछि प्रहरीले ३ राउन्ड हवाइ फायर समेत गरेको थियो।
केही प्रत्यक्षदर्शीले मकैबारीमा रहेका आन्दोलनकारीले पनि गोली फायर गरेको बताएका छन्। घाईते पान्डेलाई अस्पताल लिएर आएका एक प्रहरी अधिकृतले पनि प्रर्दशनकारीहरुले चलाएको गोली लागेर पान्डे घाईते भएको बताए।
यद्यपी प्रर्दशनकारीहरुले गोली चलाए /नचाएको भन्नेबारे स्बतन्त्र रुपमा पुष्टी भने भई सकेको छैन।
प्रहरीले सोही घटनामा संलग्न रहेको अभियोगमा ३ जना प्रर्दशनकारीहरुलाई नियन्त्रणमा लिएको छ। थरुहट/थारुवान संघर्ष समिति बर्दियाका प्रवक्ता देबमान चौधरीले प्रहरीले मैनापोखरको घटनामा संलग्न रहेको आशंकामा राम नरेश चौधरी, राम हर्ष चौधरी र अबिनाश चौधरीलाई प्रहरीले पक्राउ गरेको बताए।
थरूहट/थारूवानका कार्यकर्तासँग भएको झडपका क्रममा प्रहरी हवल्दार पाण्डेको दायाँ खुटटाको घुँडा मुनी गोली लागेको थियो।
दायाँ खुट्टाको घुडा मुनी लागेको गोलीले छेडेर बाया खुटटामा समेत चोट लागेको थियो। खुटटामा गोली लागेका उनको अत्याधिक रक्तश्राब भएर उपचारका लागि अस्पताल लैजादै गर्दा बाटैमा मृत्यु भएको हो।
घटनास्थलबाट बर्दियाको मैनापोखरबाट नेपालगन्ज ल्याउने क्रममा बाटैमा हबल्दार पान्डेको मृत्यु भएको प्रहरीले जनाएको छ। प्युठान धर्मावती स्थायी घर भएका प्रहरी हबल्दारको परिबार बाँकेको नेपालगन्जमा बस्दै आएका थिए।
प्रहरी हबल्दार पान्डेको अत्याधिक रक्तश्रावका कारण मृत्यु भएको नेपालगन्ज मेडिकल कलेज शिक्षण अस्पताल नेपालगन्जका चिकित्सक डा.शशीकुमार यादवले बताए।
थरुहट/थारुवान संघर्ष समिति बर्दियाका संयोजक गोविन्द थारुले प्रर्दशनकारीसँग लठ्ठी समेत नभएको बताउँदै आन्दोलनकारीले गोली चलाएको भन्ने प्रहरीको भनाई गलत भएको बताए। ‘हामीसँग लठ्ठीसम्म थिएन। हामीले शान्तिपूर्ण आन्दोलन गर्दै आएका छौ प्रर्दशनकारीले गोली चलाए भन्ने प्रचार गलत र आन्दोलकारीलाई दमन गर्ने उद्देश्यले चलाइएको हो।’
