त्रिभुवन विश्वविद्यालयका पूर्व उपकुलपति केदारभक्त माथेमाले नेतृत्व गरेको समितिको सिफारिश अनुसार सरकारले निजी मेडिकल कलेजहरूले एमबिबिएसमा विद्यार्थी भर्ना गर्दा यो वर्ष प्रति व्यक्ति ३५ लाख रूपैयाँभन्दा धेरै रकम लिन नपाउने निर्णय गरेको छ।
माथेमा प्रतिवेदनका धेरै महत्वपूर्ण सिफारिश लागु गर्न आलटाल गरेपनि सरकारले शुल्कसम्बन्धी सिफारिश भने लागु गर्ने निर्णय गरेको हो। यस्तो निर्णय हुने थाहा पाएपछि निजी मेडिकल कलेजहरूले ३५ लाख शुल्क लागु गर्न नसकिने दाबी गर्दै सरकारलाई ज्ञापन पत्र बुझाएका छन्।
बुधबार निजी मेडिकल एसोसिएसनको डेलिगेसनले शिक्षामन्त्री चित्रलेखा यादवलाई भेटी ३५ लाख शुल्क कायम गर्न नसकिने जानकारी दिएको छ। साथै एसोसिएसनले माथेमा प्रतिवेदनले सिफारिश गरे अनुसार एमबिबिएस पढ्ने सिट संख्या पनि १५० बाट घटाएर १०० कायम गर्न पनि नसकिने जनाएको छ।
ज्ञापन पत्रमा भनिएको छ, 'माथेमा प्रतिवेदनमा सिफारिश गरिएको ३५ लाख रुपैयाँमा एमबिबिएस पढाउने कुरा कोरा कल्पनामात्रै हो।'
के साँच्चै ३५ लाखमा एमबिबिएस पढाउन सम्भव छैन?
निजी मेडिकल कलेजहरूसँग छलफल गरेर, उनीहरूको लागत लगायत सबै पक्षलाई ध्यान दिएर नै एमबिबिएसको शुल्क ३५ लाख रूपैयाँ तोकिएको माथेमा समितिका एक सदस्य बताउँछन्।
काठमाडौं उपत्यकामा संचालित देशको सबैभन्दा उत्कृष्ट अस्पतालमध्येको धुलिखेल अस्पतालले नै ३५ लाख भन्दा कममा एमबिबिएस पढाउन सम्भव छ भनेर देखाएको छ। काठमाडौं विश्व विद्यालय अन्तर्गत संचालित सो मेडिकल अस्पतालले यसपालि पनि एबिबिएस पढ्नका लागि प्रतिव्यक्ति ३२ लाख ९० हजार रूपैयाँ शुल्क तोकेको छ।
धुलिखेल अस्पताल विशुद्ध गैरनाफामूलक संस्थाका रुपमा संचालन भएकोले त्यहाँ उपचार खर्च पनि सस्तो छ। बाहिरबाट आउने बिरामीले २५ रुपैयाँमा टिकट काटेर डाक्टरलाई आफ्नो स्वास्थ्य जाँच गराउन सक्छन्। अन्य जाँच खर्च पनि धेरै सस्तो छ। जस्तै, धुलिखेल अस्पतालमा सिटी स्क्यानको २५०० रुपयाँ मात्रै लाग्छ, जबकि अधिकांश निजी मेडिकल अस्पतालले ४५०० रुपैयाँ सम्म लिने गर्छन्।*
'धुलिखेलले सबै शुल्क यति सस्तो राखेर पनि बिरामीलाई स्तरीय सेवा दिन सक्छ भने अरु निजी अस्पतालहरूले नसक्ने कुरै छैन,' माथेमा समितिका एक सदस्यले सेतोपाटीसँग भने, 'निजी मेडिकल कलेजले त उपचार गर्न गएका बिरामीसँग पनि चर्को मूल्य असुल्ने गरेका छन्।'
३५ लाख रुपैयाँ शुल्क लिएर अधिक नाफा नकमाउलान् तर नाफा कमाउन भने सम्भव रहेको उनले जिकिर गरे।
* संसोधन गरिएको
