तुलसीपुरको त्रिशिद्धेस्वरी मन्दिरमा मंगलबार दिउँसो १ बजेतिर विवाह चलिरहेको थियो। वातावरण निकै उल्लासपूर्ण थियो। केटा पक्षका मानिसहरु वसमा चढेर जन्ति आएका थिए। मन्दिरमा बेहुला वेहुलीको विवाह सम्पन्न गर्न पुरेतले आफ्नो काम गरिरहेका थिए।
तर त्यो खुसी र उल्लासपूर्ण समारोह धेरै समय टिक्न पाएन। कारण त्यहाँ बालसञ्जालका पदाधिकारी र अधिकारकर्मी पुगेर वालविवाह गर्न नपाइने भन्दै कानुन सम्झाउन थालेका थिए। उनीहरुले पुरेतलाई काम रोक्न आग्रह गरे। वाल विवाह गराउने पुरेतलाई पनि कानुनी कारबाही हुने चेतावनी दिए।
केटा पक्षका वावुआमालाईपनि त्यस्तै कुरा सम्झाउन खोजे। तर केटा पक्षका अविभावकले विरोध जनाउन थालेपछि माहोल गर्मागर्मी र तनाव युक्त वन्न पुग्यो। पहिला उक्त वैवाहिक समारोहमा तुलसीपुर नगर बालसञ्जालका तेज श्रेष्ठ र सदस्य माधव न्यौपाने मात्रै पुगेकोले उनीहरुको त्यत्रो जन्तीका अघि कुनै उपाय नचलेपछि उनीहरु वाहिर निस्किका थिए। उनीहरु वाहिर निस्किएर नव जागरण महिला तथा वालसंरक्षण केन्द्रकी सचिव नानीमैया वलीलाई फोन गरी परिस्थितिको वारेमा जानकारी गराए।
ठीक त्यहि बेला काम रोकेका पुरेतले वेहुलालाई छिटो छिटो सिन्दुर हाल्न लगाएका थिए। नानी मैया ओलीले डिएनजियोसिसीको सामाजिक कार्यकर्ता निरला गैरेलाई पनि तुलसीपुरको त्रिशिद्धेश्वरी मन्दिरमा भइरहेको वालविवाहको वारेमा जानकारी गराएपछि दुबै जना मिलेर उक्त स्थान पुगेर सबैपक्षलाई सम्झाउने प्रयास गर्दा उनीहरुले प्रहरीले नै विहेको स्वीकृति दिएको बताएपछि प्रहरी बोलाइएको थियो। तर प्रहरी कहाँ पुगेपछि भने उनीहरुले झुट कुरा वोलेको प्रमाणित भएको थियो।
पछि प्रहरीले उनीहरुलाई ईलाका प्रहरी कार्यालय तुलसीपुरमा लगेर गयो। केटीको अविभावकलाई पनि बोलाएर कानुनी परामर्स पछि बेहुला र वेहुलीलाई आ-आफ्ना वावुआमाको जिम्मा लगाइएको डिएसपी कृष्ण प्रसाइले बताए।
दुवै पक्षका अविभावकले बालबिवाह सम्वन्धि कानुनी जानकारी नभएकोले केटा/केटीको राजीखुसीमा आफूहरुले साथ दिएको भएपनि अब उमेर नपुग्दासम्म पढाउने प्रतिवद्धता सहित कागज गरेका छन्।
कानुनी रुपमा उमेर पुगेमा फेरि उनीहरूको विवाह गर्ने सहमति भएको छ। तुलसीपुरस्थित सेन्टरमाविमा कक्षा १० पढ्ने केटा र कक्षा ८ मा पढ्ने केटी दुबै तुलसीपुर ६ निवासी हुन्। केटाको तुलसीपुरको नयाँ वसपार्क सितलनगरमा घर छ भने केटीको वरूवा गाउँमा घर रहेको प्रहरीले बताएको छ। केटा नेपाली थरका थिए भने केटी विक थरकी रहेको बताइएको छ।