टीकापुरमा भएको हिंशात्मक घटनामा संलग्न रहेको आरोपमा थप ११ जनालाई पक्राउ गरिएको छ। ११ मध्ये ३ जनालाई सोमबार नै छाडिएको छ। ८ जनालाई नियन्त्रणमा लिएर अनुसन्धान थालिएको कैलालीका प्रमुख जिल्ला अधिकारी मोहन चापागाईले बताए।
सुरक्षाकर्मीले टीकापुर, जोशीपुर र थापापुर गाविसबाट ७ जना र बर्दियाबाट एक जनालाई पक्राउ गरेका हो। उक्त घटनामा संलग्नको अभियोगमा यसअघि ७ जनालाई पक्राउ गरेर कर्तव्य ज्यान मुद्दा चलाइएको छ।
घटनामा संलग्नको भएको अभियोगमा आवश्यक छानबिनका लागि पक्राउ गरिएको बताउँदै प्रमुख जिल्ला अधिकारी चापागाईले आवश्यक छानबिनपछि निर्दोषलाई छाडिने बताए। उनले थप संलग्नको खोजी भईरहेको पनि बताए।
पक्राउ पर्नेमा थापापुर गाविस–७, नवलपुरका वृजमोहन चौधरी, राजेश चौधरी, थापापुर–६, का बिश्राम चौधरी, थापापुर–८, का सन्तराम चौधरी, शितलदास चौधरी, बिसन चौधरी र टीकापुर–१, का बिरु चौधरी रहेका जिल्ला प्रहरी कार्यालय कैलालीले जनाएको छ। टीकापुरका एक जनालाई बर्दियाबाट पक्राउ गरिएको छ।