विनासकारी भूकम्पले धाँजा फाटेका र कमजोर भएका जमिन बर्खायामसँगै पहिरो जानथालेपछि जिल्लाबासीमा चिन्ता छाएको छ। भुकम्पले घर भत्काएपछि अस्थायी बसोवासका लागि बनाइएका टहरोसमेत पहिरोले बगाउला भन्ने चिन्ता परेको हो।
विनासकारी भूकम्पले दिएको पीडा र सास्ती त छँदैछ। वर्षायामसँगै भूकम्पले कमजोर बनाएका जमिन पहिरो जान थालेपछि सिन्धुबासी त्रासमा जीवन गुजारी रहेका छन्। वर्खायामको झरीले जताततै पहिरो जान थालेपछि भूकम्पपछि बनाइएका टहरो पनि पहिरोले लाने हो कि भन्ने चिन्ता स्थानीयलाई छ। विशेष गरी जिल्लाको हिमाली गाउँबासीलाई यस्तो चिन्ताले सताएको हो। जिल्लाको बराम्ची, पाङताङ, हगाम, जलवीर, गोल्चे, गुम्बा, सेलाङलगायतका गाउँमा बनाइएका टहरा पहिरोले बगाउला भन्ने चिन्तामा स्थानीय छन्।
त्यस्तै पश्चिमी भेगको भोताङ, थाङपालधाप, गुन्सा, बरुवा, लाँगर्चे, हेलम्बुलगायतमा पनि पहिरोको त्रास छ। भूकम्पपीडितहरु टहरोमात्रै नभई कतै हिँड्ने बेलामा पहिरो आएर आफैंलाई पुर्नसक्ने सम्भावना रहेको बताउँछन्। पाङताङका लक्ष्मण तामाङले भूकम्पका कारण जताततै पहिरो गएकाले कतै हिँडडुल गर्न गाह्रो भइरहेको बताए। उनले भूकम्पले जमिन चिराचिरा पारेकाले त्यहाँभित्र पानी पसेको हुँदा कुनै पनि बेला पहिरो जानसक्ने अवस्था रहेको बताए।
अविरल बर्षासँगै जिल्लाका सबैजसो गाउँमा लगातार पहिरो गइरहेको छ। स्याउले १ स्थित कातर्चेमा पहिरो जाँदा त्यो बाटो भई जाने पैदल यात्रु डराई डराई हिँड्ने गरेका छन्। ओखरेनी जाने छोटो बाटोमा पहिरोको जोखिम बढेपछि स्थानीयहरु लामो बाटो प्रयोग गर्न बाध्य बनेका छन्। सेलाङका टंकबहादुर सिलवाल ३५ मिनेटको बाटो प्रयोग गर्न पहिरोको डर भएकाले झण्डै २ घण्टा लाग्ने लामो बाटो हिँड्नुपर्ने बाध्यता रहेको बताउँछन्। उता बासस्थानका लागि अस्थायी आवास बनाइएकोमाथि पहिरो जाने गरेकाले थप संकट भएको उनले सुनाए।
टहरोमा जिविकोपार्जन गर्दै आएका भूकम्पपीडितलाई वर्षायामले सास्ती दिएको छ भने कतिपय गाविसका भूकम्पपीडित पहिरोको जोखिमको कारण विस्थापित भएका छन्। सरकारले भूकम्प अति प्रभावित सिन्धुपाल्चोकका ११ गाउँका बासिन्दालाई अन्यत्र सार्नुपर्ने सिफारिस गरेको थियो। हाल जलवीरे र बराम्चीका मात्र ३ सय ४२ जनालाई सरकारले कोइरालाडाँडामा स्थानान्तरण गरेको छ। त्यस्तै गोल्चेबाट सेलाङ, बाह्रबिसे ७ बाट स्थानीय रुम्चीटोल, हेलम्बु क्षेत्रबाट तिम्बुफाँट, गुम्बाबाट पाङताङ, गोल्चेबाट बैकुण्ठेमा गरी ५ सय ६९ परिवारलाई स्थानान्तरण गरिसकिएको छ। भूकम्पबाट क्षतिग्रस्त डाँडाहरू खस्ने र धाँजा फाटेका बस्ती बग्ने सम्भावना देखेपछि त्यस्ता स्थानबाट स्थानान्तरण सुरु गरिएको प्रमुख जिल्ला अधिकारी बलभद्र गिरी बताउँछन्।
जताततै पहिरोको उच्च जोखिम भएपछि जिल्ला दैवी प्रकोप उद्धार समितिले स्थानीयवासीलाई संयमता अपनाउन आग्रह गरेको छ। समितिले स्थानीयवासीलाई सुरक्षित स्थानमा बस्न जानकारी गराएको गिरीले बताए।