विराटनगर बजारमा देखापरेका पाँच सय र एक हजारका नक्कली नोट। तस्बिर: प्रभाषचन्द्र झा, विराटनगर, रासस
एक हजार र पाँच सय रुपैंयाका नक्कली नोट विराटनगर बजारमा देखिन थालेका छन्।
असली नोटलाई रङ्गीन फोटोकपि मेसिनबाट रु एक हजार र रु पाँचसयको नोटको हुबहु देखिने गरी सेतो कागजमा प्रिन्ट गरेर असली नोटका रुपमा बजारमा प्रवाह गर्ने गरेको पाइएको छ।
यस कार्यमा संलग्न गिरोहले बडो सतर्कतापूर्वक बजारका भीडभाड भएका पसलका साथै नोटको कारोबार गर्ने आधिकारिक संस्थामा नोटको बन्डलमा एक/दुई थान मिसाएर चलनचल्तीमा ल्याउने कार्यमा बढी सक्रिय छन्।
झट्ट हेर्दा असली नोटजस्तै देखिने भएकाले जो कोही पनि झुक्किन सक्छन्। नेपाली नोटमा नक्कली हुँदैन भनी सर्वसाधारण विश्वासका साथ खल्ती वा सुरक्षित स्थानमा राख्ने गर्दछन् जबकी भारतीय नोटलाई उल्ट्याइ पल्टाइ हेरेर सक्कली नोट प्रमाणित भएपछि मात्र खल्तीमा राख्छन्।
रङ्गीन फोटोकपि मेसिनबाट निकालिएको नक्कली एक हजारको नोटको आकार केही छोटो छ । नोटको चाँदीको धर्को कम टल्किने र अलि कालो देखिन्छ । वाटरप्रिन्ट देखिँदैन र असली नोटको तुलनामा कागज अलि मोटो र खस्रो छ। झट्ट हेर्दा जो कोेहीलाई नक्कली नोट हो भनी छुट्याउन गाह्रो हुन्छ।
असली नोट पानीमा भिजे पनि खासै फरक पर्दैन तर फोटोकपि गरिएका त्यस्ता नोट पानीमा भिज्नासाथ नोटको रङ्ग तुरुन्त उड्ने गर्दछ। नक्कली नोटमा एक थोपा पानी खसाउँदा रङ्ग उडेर दागका रुपमा परिणत हुन्छ।
यस सम्बन्धमा एक आधिकारिक संस्थाका कर्मचारी स्रोत उल्लेख नगर्ने सर्तमा बताउँछन्, “एकैचोटी बन्डलका बन्डल नोट आएका खन्डमा मेसिनबाट गन्ती गर्नुपर्दछ। मेसिनबाट गन्ती गर्दा नक्कली नोट हो भनी थाहा पाउन सकिँदैन। ढुकुटीमा राख्ने क्रममा औँलाले गन्ती गरेर राख्ने नियम छ। सो बखत नोट छुनासाथ नक्कली नोट हो भनी थाहा पाइन्छ।”
त्यस्ता नोट ल्याउने व्यक्तिको पहिचान नहुँदा प्रहरीलाई पनि जानकारी गराउन नसकिने अवस्था हुन्छ । सो नोट कसले ल्याएको लगायत विभिन्न प्रकारका प्रश्नको जवाफ दिनुभन्दा बरु सो बराबरको रकम तिरेर उक्त नक्कली नोटलाई जलाउने गरेको थाहा भएको छ।
सर्वसाधारण नेपालीलाई आफ्नो मुलुकको नोट नक्कली छैन भनी विश्वासको फाइदा उठाएर यस आपराधिक कार्यलाई त्यस्ता गिरोहले निरन्तरता दिइरहेका छन्।
यस सम्बन्धमा मोरङका प्रहरी नायब उपरीक्षक प्रभुप्रसाद ढकालले नक्कली नोटका विषयमा कतैबाट कसैले उजुरी नगरेको र यस विषयमा प्रहरी गहिरिएर लागेको जानकारी गराए। रासस
