संयुक्त राजनीतिक दलित संघर्ष समितिले दलित मैत्री संविधान जारी गर्नु पर्ने भन्दै मंगलबार गरेको एक घण्टे चक्काजाम कार्यक्रममा प्रहरीले हस्तक्षेप गरेको छ। राजधानीको विजुलीबजारमा बिहान ११ बजेदेखि १२ बजेसम्म चक्काजाम गर्न लागेको समितिका सदस्यलाई प्रहरीले हस्तक्षेप गरेको हो। प्रहरीले लाठी चार्ज गर्दा दर्जन बढी समिति सदस्य घाइते भएका छन्।
धेरै जनाको टाउकोमा चोट लागेको छ। घाइतेहरुको सिभिल अस्पताल र मोडल अस्पतालमा उपचार भइरहेको एकिकृत नेकपा माओवादीका नेता आहुतीले सेतोपाटीलाई बताए। उनका अनुसार प्रहरी हस्तक्षेपमा २ जनाको हातखखुट्टा पनि भाँचिएको छ। विभिन्न राजनीतिक दलसम्बद्ध र दलित अधिकारकर्मी संस्थाहरुले दलित मैत्री संविधान बनाउन माग गर्दै बुधबार पनि देशभरी प्रदर्शन गर्ने बताएका छन्।
उता काठमाडौं प्रहरी परिसरका प्रवक्ता एसपी विश्वराज पोखरेलले बिजुली बजारबाट विरोध र्याली बानेश्वरतर्फ अघि बढ्न लाग्दा प्रहरीले रोकेपछि अान्दोलनकारीले ढुंगा प्रहार गरेको बताए। उनका अनुसार प्रहरी र अान्दोलनकारीबीचको झडपमा ३ जना डिएसपी, १ जना इन्सपेक्टर असई र हवल्दार गरी १० जना प्रहरी घाइते भएका छन् ।
झडपमा डिएसपी रेवती ढकाल गम्भीर घाइते भएका छन् । उनको पछाडी डाढ र हातमा चोट लागेको छ । डिएसपी दानबहादुर कार्की र सन्तोष खड्काको खुट्टामा चोट लागेको छ । इन्सपेक्टर दुर्गा गुरुको आखाँमा चोट लागेको छ। पोखरेलका अनुसार सई प्रकाश भेटवाल, असई कपील ढकाल र प्रहरी हवल्दार लालबहादुर घाइते भएपछि अस्पताल भर्ना भएका छन्।
