बलिउड अभिनेता सलमान खानको फिल्म ‘बजरंगी भाइजान’ मा एक पाकिस्तानी बालिका भारतमा छुट्छिन्। उनलाई पाकिस्तानमा रहेको परिवारसँग मिलाउन बजरंगले ठूलो चुनौति मोल्छ। धर्म र मानवताका विषयमा आधारित सो फिल्मको कथा काल्पनिक हो। तर पाकिस्तानमा एक युवती १४ वर्षदेखि त्यस्तै बजरंगीको पर्खाई रहेको भारतीय सञ्चार माध्यमले जनाएका छन्।
समाचार अनुसार गीता नाम दिइएकी ती युवती न बोल्न सक्छन् नत सुन्न नै। उनी अहिले कराँचीमा रहेको एक सामाजिक संस्थामा आश्रय लिइरहेकी छन्। गीताले बाल्यकालमै झुक्किएर भारतीय सीमा पार गरेर पाकिस्तान पुगेको हुन सक्ने बताइएको छ। बोल्न र सुन्न दुवै नसकेपनि उनले भारतको नक्सामा झारखण्ड, तेलंगना जस्ता ठाउँमा औलाले देखाउने गर्छिन्।
संस्थाका स्वयंसेवीले उनका लागि छुट्टै पुजाकोठा बनाइदिएका छन्। हिन्दु देवीदेवताको मुर्ति र पोस्टरमा उनले पूजा गर्छिन्। पूर्वमन्त्री तथा अधिकारकर्मी अन्सर बुर्नीले समाचार संस्था पिटिआईलाई आफूले नेपालबाट ल्याएको गणेशको मूर्ति गीताको कोठामा राखिदिएको बताए।
सलमानको फिल्म चर्चित बनेपछि संस्थाका कर्मचारीले गीतालाई भारत फर्काउन पहल थालेका छन्। यसअघि पनि उनीहरूले पाकिस्तानमा रहेको भारतीय उच्च आयुक्तको कार्यालयमा खबर गरेका थिए। भारतीय अधिकारीहरुले गीताको तस्बिर पनि खिचेर लगेका थिए। तर उनीहरुले गीतालाई फर्काउन त्यसपछि केही पहल गरेनन्।
गीताले कराँचीमा आश्रय लिएको समाचार सार्वजनिक भएपछि भारतीय विदेश मन्त्री सुष्मा स्वराजले पाकिस्तानमा रहेको भारतीय उच्च आयुक्तलाई गीताबारे जाँचबुझ गर्न निर्देशन दिएकी छन्।