मिडिया र अभिनेता ल्याएर आफूहरूको अपमान गरेको भन्दै सिरहाको धनगढी - ३ नयनपुरका महिलाले दीपक मलिकमाथि आक्रमण गरेका छन्। मलिक माथि गए राति कथित ठुला जात भनिने स्थानीय बासिन्दाको समुहले हातपात गरेका हुन्। केही महिलाले मलिकको लुगा च्यातिदिएका छन्। उनीहरूले मलिकलाई इनारको पानी भर्न नदिएर झन् अप्ठेरो अवस्था सिर्जना गरेका छन्। मलिकको सुरक्षा खतरा बढेको स्थानीयबासी रामचन्द्र राम (चमार) ले सेतोपाटीलाई बताए।
हिजो राित नै स्थानीय प्रहरीलाई घटनाबारे जानकारी दिएपनि प्रहरीले भोली आउँछु भनेर टारेको रामचन्द्रले बताए। इलाका प्रहरी कार्यालय धनगढीका सई श्यामकिशोर यादवले हिजो राति अर्को गाउँमा झगडाको मुद्धा मिलाउन गएकाले जान नभ्याएको बताए। इलाका प्रहरी कार्यालयदेखि मलिकको गाउँ ३ किलोमिटरको दुरीमा रहेको छ। यादवले दुवै पक्षलाई चौकीमा बोलाएको भएपनि सोमबार मध्यान्ह १२ बजेसम्म दुवै पक्ष चौकीमा नआएको बताए। रामचन्द्रका अनुसार स्थानीय वािसन्दाले दीपकलाई प्रहरी चौकीसम्म जान पनि दिएका छैनन्। सई यादवले अब प्रहरी टोली नै नयनपुर जान लागेको सेतोपाटीलाई बताए।
