सशस्त्र प्रहरी बलले प्रहरी शब्द नहटाउन माग गर्दै आज एमाले र एकीकृत माओवादीका शीर्ष नेताहरुसँग भेट गरेको छ ।
एमाले अध्यक्ष केपी शर्मा ओली, उपाध्यक्ष तथा गृहमन्त्रीसमेत रहेका वामदेव गौतम, एकीकृत माओवादीका अध्यक्ष पुष्पकमल दाहाल र नेता बाबुराम भट्टराईलाई भेटेर उसले नेपाल प्रहरीले भनेजस्तो प्रहरी शब्द हटाउन नहुने बताएको छ ।
किन हटाउनुहुन्न त सशस्त्र प्रहरी बलको प्रहरी शब्द । सशस्त्रले आज शीर्ष नेताहरुसँगको भेटमा १२ बुदाँ पेश गरेको छ ।
१, सशस्त्र प्रहरी शब्द हटाए प्रहरी नियमावली परिवर्तन गर्नुपर्ने ।
२, संघीयतामा गएपछि सशस्त्र प्रहरी परिचालन गर्न समस्या हुने ।
३, प्रहरी शब्द हटाए रक्षा मन्त्रालय मातहत चल्नुपर्ने ।
४, सशस्त्रलाई प्रमुख जिल्ला अधिकारीले परिचालन गर्न नसक्ने ।
५, १५ वर्षदेखि सशस्त्र प्रहरीको पहिचान गुम्ने खतरा । शून्य लेवलबाट काम थाल्नुपर्ने ।
६, प्रहरी संरचनामा खलल पुग्ने ।
७, सशस्त्र कर्मचारीहरुको अधिकार गुम्ने ।
८, छिमेकी देशहरुको पनि अर्धसैनिक बलको नाममा प्रहरी नै हुने हुदाँ त्यस्तै हुनुपर्ने ।
९, अन्तर्राष्ट्रिय छबि गुम्ने ।
१०, संयुक्त राष्ट्र संघमा परिचालन हुन समस्या पर्ने ।
११, बोर्डरमा परिचालन गर्न समस्या हुने ।
१२, प्रहरी हटाए कस्तो फोर्स गठन हुन्छ भनेर कल्पना नै गर्न नसक्ने ।
नेपाल प्रहरीले सशस्त्र प्रहरी बलको प्रहरी शब्द झिक्नुपर्ने सुझाव दिएपछि सशस्त्रका अधिकारी आज दिनभर शीर्ष नेतासँगको भेटघाटमा व्यस्त रहेका हुन् । भेटका क्रममा नेताहरुले सशस्त्रले पेश गरेको बुदाँ सकरात्मक भएको टिप्पणी गरेको एक डिआइजीले जानकारी दिए ।
