दाङका प्रहरी प्रमुख एसपी कुबेर कडायत नेपाल भारतको दाङमा पर्ने २६ नम्बर सिमानामा
दाङको तीन गाविस र आसपासका क्षेत्रमा नेपाली रुपैयाँ पाउनै मुस्किल रहेको छ । नेपाली रुपैयाँ भएपनि ती रकम त्यस क्षेत्रमा चल्ने गरेका छैनन् । राजपुर, कोइलाबास र बेला गाविस र आसपासका क्षेत्रमा नेपाली रुपैयाँले स्थान नपाउने गरेको दाङ एसपी कुबेर कडायतले सेतोपाटीलाई जानकारी दिए ।
ती क्षेत्रको ३ दिन पैदल निरीक्षण गरेका थिए । 'सिमा क्षेत्रमा नेपालीको बिजोग छ',उनले भने, 'पानी मात्र चल्छ अरु केही चल्दैन।' भारतीय रुपैयाँमात्र चल्ने, संचार सुविधा पनि भारतकै चल्ने, बजार पनि भारतमा नै जानुपर्ने अवस्था रहेको उनले सुनाए ।
'केही खाद्यान्न किन्न बजार आउनुपरे नेपालतर्फ ६ देखि ८ घन्टा लाग्ने र भारत जादाँ २ देखि ३ घन्टामा नै पुगिने रहेछ', एसपी कडायतले भने । सो क्षेत्रका प्राय सबै मजदुरीका लागि भारत जाने गरेको र कृषिमा मकैमात्र फल्ने उनले सुनाए । सो क्षेत्रमा सबै ऐलानी जग्गा मात्र भएको उनले बताए ।
सरकारी कार्यालयको नाममा ती क्षेत्रमा स्वास्थ्य चौकी मात्र पाइएको र त्यो पियनमा भरमा चल्ने गरेको उनले बताए । सो क्षेत्रमा नेपाल प्रहरीका ८ वटा युनिट खटेको पनि उनले जानकारी दिए । दाङमा भएका २६ वटा नाकामा ६८ वटा सिमा स्तम्भ रहेको र अधिकांश भत्किएको उनले सुनाए ।
४५ नम्बर पिल्लर आधा भत्किएको र ४४ नम्बर पिल्लर खोलाले बगाएको उनले बताए । सिमा जिर्ण र भत्किएपछि भारतीयहरुले रुखलाई आधार बनाएर पिल्लर मान्ने गरेको उनले सुनाए । पछिल्लो समय सो क्षेत्रमा भारतीयहरुबाट सिमा मिच्ने काम नभएको उनले बताए ।