नवलपरासीको कुडिया-४मा शिवमंगल कोहारका १० वर्षीय छोरा सोनु भनिने जीवन कोहारको
बलि दिने नाममा हत्या गरिएको घटनामा संलग्नलाई कारबाही गर्न मानवअधिकार आयोगले सरकारको ध्यानाकर्षण गराएको छ।
आयोगले यो घटनालाई …क्रूरतम जघन्य अपराध' भन्दै घटनामा संलग्नलाई कारबाही गर्न सरकारलाई आग्रह गरेको हो।
आयोगले अन्धविश्वासका कारण यो घटना भएको भन्दै यस्ता घटना दोहोरिन नदिन सचेतनाका कार्यक्रम पनि सञ्चालन गर्न सुझाएको छ।
आयोगकी प्रवक्ता मोहना अन्सारीद्वारा आइतबार सार्वजनिक विज्ञप्तिमा भनिएको छ,…समाजमा हुने यस्ता क्रूर आमानवीय र पाशविक कार्य नियन्त्रण गर्न मौजुदा कानूनहरुलाई समय सापेक्ष परिमार्जन गरी सशक्त कानून वनाउन आयोग सरोकारवालाहरुको ध्यानाकर्षण गर्दछ।'