कास्की पहिरोमा परी मृत्यु हुनेको संख्या ३१ पुगेको छ। जिल्ला प्रहरी कार्यालय कास्कीले दिएको जानकारी अनुसार लुम्लेमा २४, भदौरे तामागीमा पाँच र ढिकुरपोखरीमा दुई जनाको मृत्यु भएको छ। भदौरे तामागीमा ४ र लुम्लेमा ६ गरी १० जना बेपत्ता भएका छन्। भदौरेमा १५, लुम्लेमा ३ र ढिकुरपोखरीमा १ गरि १९ जना घाइते रहेका छन्। भदौरेका अधिकांश घाइते सिरियस रहेको अस्पतालले जानकारी दिएको छ।
बुधबार साझँदेखि परेको पानीका कारण कमजोर बनेका जमिन चर्केर खस्दा पहिरो गएको हो। भूकम्पले कमजोर बनाएको जमिनमा थोरै मात्र पानी पर्दा पनि पहिरो खसेको प्राविधिकहरु बताउँछन्। लुम्ले गाविसको माझघर गाउँ माथिबाट झरेको सानो पहिरोले खानेपानी ट्यांकीमा क्षति पुर्याएपछि एक विद्यालयसहित १० घर पूर्ण रुपमा भत्केका छन्। रातिको समयमा पहिरो आएका कारण घरमा सुतेकाहरु भाग्न नसकेर ज्यान गुमाउनु परेको स्थानीय बालकृष्ण देवकोटाले बताए।
उनले भने–‘माथि ठूलो खोल्सो पनि थिएन, तर २० हजार लिटर क्षमताको खानेपानी ट्याकी फुटेपछि त्यसैको पानीका कारण गाउँ बगाएको हो।’ सबैभन्दा माथि घर भएका छिरिङ राईको घर पहिला भत्केपछि क्रमशः तलका घर पहिरोमा परेका थिए।
अविरल वर्षाकै कारण कास्कीको भदौरे तामागी गाविस ५ डुडेको फाँटमा ५ जनाले ज्यान गुमाएका छन्। फेवातालको मुहान भनेर परिचित भदौरे तामागी ५ डुडाफाँटमा राति करिब १ बजेतिर आएको पहिराले घर पुरेको हो। पहिरोले एक कुखुराको खोरसहित १० घर पुरिएका छन् भने अन्य घरहरु जोखिममा परेका छन्।
साँझ ९ बजेदेखि आएको पानीले विस्तार विस्तार गति लिँदा डुडेफाँट नजिकैबाट बग्ने हर्पन खोलाको सुस्केरा पनि बढ्दै गएको थियो। करिब २ किलोमिटरमाथि भदौरे तामागी ५ सिमपानीबाट आएको जल्कीनी खेलाले घरसहित उनीहरुलाई बगाएको स्थानीय उपेन्द्र पराजुलीले बताए। उनले भने - ‘हामी पनि घर मै थियो खोलामा बाढी आएर खोला कराइरहेको थियो। त्यसै बेला बचाऊ बचाऊ भन्ने आवाज सुनेर बाहिर निस्कँदा त माथिबाट पहिरो आएको रहेछ।’ उनका अनुसार तलका घरहरु सुरक्षित छैनन् भन्दै माथिडाँडाँतिर लागेकाहरुलाई माथिबाटै आएको पहिरोले पुरेको थियो। तीमध्ये धेरै बगेको र केहीको ज्यान गएको थियो।
वर्षाका कारण पोखरा– बाग्लुङ राजमार्गको दर्जनौं स्थानमा गएको पहिरो हटाएपछि एक तर्फी राजमार्ग खुलेको प्रहरीले जानकारी दिएको छ। रुख सहितको लेदो माटो सडकमा थुप्रिएका कारण समस्या आएको हो।