गत शुक्रबार साँझ ललितपुरको नख्खुमा भएको डरलाग्दो दुर्घटना गराउने रात्री बसका चालकलाई प्रहरीले ४ दिनपछि पक्राउ गरेको छ। सर्लाही ईश्वरपुरका २८ वर्षे दीपनारायण सिंह दनुवारलाई केन्द्रीय अनुसन्धान व्युरो सिआइबीको सहयोगमा मंगलबार दिउँसो पक्राउ गरिएको ललितपुर ट्राफिक प्रहरी प्रमुख सिताराम हाँछेथुले जानकारी दिए। गत शुक्रबार नेपाल बन्द खुल्ने वित्तिकै उनले चलाएको ना ५ ख ३७४४ नम्बरको बसले नख्खुमा मोटरसाइकललाई ठक्कर दिएको थियो ।
मोटरसाइकल चालक रौतहटका आकाश थिङको दाहिने खुट्टा घुँडाभन्दा मुनि छुट्टिएको छ। मोटरसाइकलमा पछाडि बसेका अदमान थिङ पनि घाइते भएका थिए। उनीहरु दुवै जनाको अहिले बि एण्ड बी अस्पतालमा उपचार भइरहेको छ।
दुर्घटना भए लगत्तै प्रहरीले जोड्न मिल्छ कि भनेर थिङको छुट्टिएको खुट्टा बोकेर अस्पताल पुगेको थियो। दनुवारले आफ्नो साइटमा बस कुदेपनि विपरित दिशामा रहेको सवारी साधनलाई मोटरसाइकलले ओभरटेक गर्न खोज्दा मोटरसाइकल बसमा आएको ठोक्किएको बताएका छन्।
स्पिडमा बस रहेका कारण ब्रेक लगाउदाँ मोटरसाइकल केही पर घिस्रिएको उनले बताए। दुर्घटनापछि आफ्नो होस नभएको र हिँडेर कलंकी पुगि रात्री बस चढेर सर्लाही गएको उनले प्रहरी समक्ष बताएका छन्।
बस चालक फरार भएपनि निकै सास्ती खेप्नुपरेको प्रहरी निरीक्षक हाछेँथुले सेतोपाटीलाई बताए।
सर्लाहीमा बसेर २ पटक आफूलाई काठमाडौं छु भनेर दनुवारले ढाँटेको उनले बताए। 'उनलाई फोन गरेर म पानीपोखरी र बालुवाटार गए, तर उनी त सर्लाहीमा बसेर ढाँटेका रहेछन्' हाछेँथुले भने।
सवारी दुर्घटनापछि चालक भाग्ने र समिति र पीडितबीच मिलापत्र हुने हुदाँ चालक खोजीमा कसैको ध्यान नपुग्दा चालकहरु भाग्नेक्रम बढेको उनले सुनाए। दुर्घटना गरेर भाग्ने चालकहरुको लागि कडा कारबाहीको व्यवस्था नभएसम्म उनीहरु भाग्ने क्रम नरोकिने भन्दै उनले चिन्ता व्यक्त गरे।
