सडक डिभिजन कार्यालय जनकपुरले भार परीक्षण नगरी मालबाहक सवारी साधन र बसलाई रातु पुलमाथि चलाउन अनुमति दिएको छ। पूर्वपश्चिम राजमार्गमा पर्ने रातु नदीको यो पुल गतबर्ष भासिएपछि सवारी साधन डाइभर्सनबाट चल्दै आएका थिए।
भार परिक्षण नगरी ठूला गाडी चलाउन अनुमति दिएपछि पुलको पिलर भासिने सम्भावना बढेको छ। पुलको ढलान सुक्न र भार परीक्षण गर्न बाँकी नै रहेको छ।
मर्मत भइनसकेको पुलबाटै एकतर्फी सवारी चलाउन दिइएको हो। सडक डिभिजनका प्राविधकले पुलको सामान्य निरीक्षण गरी चलाउन अनुमति दिएका थिए।
पुल मर्मतको ठेक्का पाएका हिम सगरमाथा कन्ट्रक्सका प्रमुख सूर्य तिमिल्ासिनाले सडक विभागले निर्माण कार्य सम्पन्न नहुँदै जबरजस्ती सवारीसाधन चलाएको बताए।
सन् १९७२ मा तत्कालीन सोभियत संघको सहयोगमा बनेको २ सय ४ मिटरको पुलको ११ नम्बर पिलर गतबर्ष साउन २८मा भासिएको थियो।
ढलान सुक्न अझै केही दिन लाग्ने भए पनि बाढीले डाइभर्सनमा क्षति पुर्याउँदा पुल खुला गरिएको सडक विभाग अन्तर्गतको पुल आयोजना पुर्वी सेक्टर नम्बर १ का प्रमुख ईन्जिनियर अर्जुन अर्यालले बताए।
गत वर्ष पुल भासिँदा डेढ महिना सम्म पूर्व पश्चिम राजमार्गमा सवारीसाधन सञ्चालन गर्न कठीन भएको थियो। भासिएको दुई वटा पिलर मर्मत सम्भ्ाारमा अहिलेसम्म तीन करोड ५५ लाख रुपैंया खर्च भईसकेको सडक डिभिजन कार्यालयले जनाएको छ।
मर्मत गरिएपनि नयाँ पुल निर्माण नहुञ्जेल समस्याको ठोस समाधान नहुने भन्दै स्थानीयले नयाँ पुल बनाउन माग गरेका छन्।
