प्रहरी महानिरीक्षक उपेन्द्रकान्त अर्यालले माथिल्लो दर्जाको आडमा प्रहरीले कानुन मिच्ने काम गर्न नहुने बताएका छन्।
प्रहरी सहायक निरीक्षकको १५९ औँं आधारभूत तालिमको दीक्षान्त समारोहलाई आज सम्बोधन गर्दै उनले कानुन मिचेर काम गर्ने जोकोहीलाई प्रहरी सङ्गठनले कारबाही गर्ने बताए। सामाजिक त्रास नियन्त्रणका लागि कार्यक्षेत्रमा सङ्गठन कटिबद्ध रहने बताउँदै उहाँले नागरिक सम्मानलाई अझै उच्च राख्न निर्देशन दिए।
प्रहरी सङ्गठन कसैको पेवा बन्न नसक्ने बताउँदै उनले सङ्गठनको गरिमालाई उच्च सम्मान गर्दै यो अवस्थासम्म आइपुगेको बताए। हावा भरेर कसैले उडाउन चाहँदैमा सङ्गठन नउड्ने बताउँदै उनले प्रहरी सङ्गठनको लामो इतिहास कसैले मेट्न नसक्ने बताए। कार्यक्रममा अतिरिक्त प्रहरी महानिरीक्षक राजेन्द्रसिंह भण्डारीले नागरिक सेवामा कटिबद्ध भएर लाग्न दीक्षित भई कार्यक्षेत्रमा जान लागेका प्रहरी सहायक निरीक्षकहरुलाई निर्देशन दिए।
कार्यक्रममा समादेशक रमेश खरेलले सपथ गराएका थिए भने तालिम प्रतिवेदन प्रहरी नायव उपरीक्षक बिमलराज कँडेलले प्रस्तुत गरेका थिए। सो अवसरमा १६ महिलासहित तीन सय ५० जना प्रहरी सहायक निरीक्षक दीक्षित भएका थिए । रासस