बुधबार दिउँसो सिन्धुपाल्चोकलाई केन्द्रविन्दु बनाएर आएको ४ रेक्टर स्केलको भूकम्पको धक्काले घर भत्कदा सिन्धुपाल्चोकमा २ जनाको ज्यान गएको छ। जिल्लाको कुन्चोक– ९ को घडेरीडाँडा यसअघिका भूकम्पले क्षतिग्रस्त घरको पिँढीमा बसेर कुराकानी गरिरहेका ८७ वर्षे गणेशबहादुर थापा र ८२ वर्षे डम्बरबहादुर न्यौपानेको घर भत्किँदा मृत्यु भएको सिन्धुपाल्चोक प्रहरी प्रमुख डिएसपी विश्व अधिकारीले जानकारी दिएका छन्।
घर भत्कँदा घाइते भएका बलबहादुर न्यौपानेलाई उपचारका लागि काठमाडौं लगिएको छ। तीन जना वृद्धहरु घरको पिँढीमा बसेर कुरा गरिरहेका बेला पहिले नै क्षति भएको घरले उनीहरुलाई किचेको स्थानीय शिक्षक चन्द्र तमुले सेतोपाटीलाई जानकारी दिए।
बुधबार दिउँसो २.४९ बज्दा सिन्धुपाल्चोक केन्द्र बनाएर ४ रेक्टर स्केलको भूकम्पको धक्का गएको राष्ट्रिय भूकम्प मापन केन्द्रले जनाएको छ। आज मृत्यु भएका २ जना सहित सिन्धुपाल्चोकमा भूकम्पबाट मर्नेको संख्या ३५ सय ३३ जना पुगेको छ।