धनगढी नगरपालिका वार्ड नं. ५ जाईस्थित लवली चोकनजिक असार ८ गते दिउँसो आफ्नै दाजु कुमार बोहरामाथि गोली प्रहार गरेर फरार दिनेश बोहरा उर्फ श्रीदास गोबिन्दसिंहलाई प्रहरीले पक्राउ गरेका छ।
घटनापछि फरार उनलाई अत्तरिया नगरपालिका वडा नम्बर ९ को बेलागाउँबाट पक्राउ गरेको प्रहरीले जनाएको छ।
आफन्त काँशी भन्ने कर्ण बोहराको घरबाट लुकिछिपी रहेको अवस्थामा सुराकीको आधारमा उनलाई एक थान कटुवा पेस्तोल र सोमा लाग्ने गोली दुई थान तथा भारतीय नम्बर प्लेटको मोटरसाइकलसहित पक्राउ गरेको जिल्ला प्रहरी कार्यालयका अपराध अनुसंधान अधिकृत प्रहरी निरिक्षक सूर्यबहादुर चन्दले बताए।
‘सुराकीले लुकिछिपी रहेको स्थानको बारेमा जानकारी दिएपछि उनलाई चारैतिरबाट घेरा हालेर पक्रन सफल भयौ’, प्रहरी निरीक्षक चन्दले भने, ‘अलिकति ढिलो भएको भए उनि भाग्न सक्ने रहेछन्, रातिको समयमा कुकुरहरु धेरै भुकेपछि हामिले छिटो कदम बढायो, उनि घरभन्दा १५/२० मिटर बाहिर निस्केर जंगल तर्फ लाग्दै गर्दा पक्रियौ।’
भारतको रुद्रपुर बस्दै आएका बोहराले हिजो आफ्नै सहोदर दाई कुमार बोहरामाथि गोली प्रहार गरि फरार भएका थिए। गोली लागेर कुमारको हिजो नै उपचारको क्रममा मृत्यु भएको छ।
धनगढीमा रहेको अचल सम्पत्तिको अंशवण्डा गर्ने विवादमा दिनेशले गोली चलाएको प्रारम्भिक अनुसन्धानका क्रममा खुल्न आएको प्रहरीले जनाएको छ। तर दिनेश भने आफूले दाजुलाई नमारेको भए उनले धेरैको ज्यान लिने बताउँदै केहि समयअघि भएको बुवाको मृत्यु स्वभाभिक नभएर आफ्नै दाजुले हत्या गरेको उनले बताए।
‘कुकुर वहुलाएपछि मार्न उचित ठानेकोले आफूले हत्या गरेको स्वीकार्दै जग्गा दाजुको नाममा गर्ने वित्तिकै मलाई समेत मार्ने उसको योजना थियो,’ दिनेश बोहराले भने।
भारतको रुद्रपुरमा विगत २० वर्ष देखि बस्दै आएका दिनेश बोहरा सिंखको रुप धारण गरि नाम समेत परिवर्तन गरेर ५ वर्ष देखि ड्राईभरी पेशा गर्दै आएका थिए। उनले भारत सरकारद्वारा संचालित रोडवेज बस चलाउँदै आएको बताएका छन्।
