वैशाख १२ गतेको विनाशकारी महाभूकम्प पीडितको राहतका लागि नेपालमा एक अर्व ७७ करोड मूल्य भन्दा बढीको ३३ लाख भन्दा बढी संख्यामा त्रिपाल भित्रिएको छ।
अर्थ मन्त्रालय अर्न्तगत भन्सार विभागले तयार पारेको विवरण अनुसार वैशाख १३ गतेदेखि जेठ २० गतेसम्मको अवधिमा व्यवसायिक प्रयोजनका लागि भन्सार महसुल छुटमा विभिन्न सरकारी तथा गैरसरकारी संघसंस्था, दातृ निकाय, व्यापारी लगायतले देशका विभिन्न नाकाबाट उक्त परिमाणमा त्रिपाल भित्र्याएका हुन्।
भूकम्पले घरबार विहिन भएका देशका झण्डै साढे सात लाख घरपरिवारको अस्थायी वासस्थान निर्माणका लागि राहत स्वरुप वितरण गर्न भन्दै देशका चारवटा भन्सार नाकाबाट मात्रै यो ३३ लाख ७ सय ६२ त्रिपाल आयात गरिएको हो। जसको मूल्य एक अर्व ७७ करोड ३६ लाख ४१ हजार ९ सय २० रुपैया हुन आउँछ। यसरी आयात गरिएकेा त्रिपाल वास्तविक पीडितका लागि पारदर्शी ढंगले वितरण हुन सकेको भए प्रति परिवार झण्डै पाँच थानका दरले पाउन सक्ने थिए।
भन्सार विभागका अनुसार, यसरी सबैभन्दा बढी संख्यामा विरगञ्ज भन्सारबाट २३ लाख ९४ हजार २ सय ९३ थान, भैरहवा नाकाबाट ८ लाख ६३ हजार १ सय ८ थान, मेची भन्सार नाकाबाट ४२ हजार २ सय ५१ थान र त्रिभुवन अर्न्तराष्ट्रिय विभानस्थलबाट १ हजार १ सय १० थान त्रिपाल नेपाल आयात गरिएको छ।
यसका बाबजूद अहिले पनि कतिपय प्रभावित जिल्लाका पीडितहरुले त्रिपाल पाउन नसकेको गुनासाहरु संसदीय समितिमा आइरहेका छन्।
