भारततर्फ तस्करी भइरहेका चार हजार दुई सय किलो सुपारी महोत्तरीको सोनमाका स्थानीय बासिन्दाहरुले शनिवार नियन्त्रणमा लिएका छन्।
सशस्त्र प्रहरी र नेपाल प्रहरीको मिलोमतोमा सुपारी तस्करहरुले खैरबन्नी नाका हुँदै ना५ख ७९०९ नम्बरको ट्रकमा लोड गरी तस्करी गरिरहेको अवस्थामा सोनमा ६ मा स्थानीय बासिन्दाले नियन्त्रणमा लिएको हो।
सुपारी तस्करले खैरबन्नी प्रहरी चौकीका प्रहरी नायव निरीक्षक प्रमोद नेपाल रघुनाथपुर प्रहरी चौकीका प्रहरी सहायक निरीक्षक दिनेश साह र खैरबन्नी सशस्त्र प्रहरी बेस क्याम्पका प्रहरी निरीक्षक अमर बिकलाई महिनवारी दिई महोत्तरीको गौशाला पर्सादेवाड खैरबन्नी रघुनाथपुर हुँदै भारतीय बोर्डर भगवतीपुर नाकाबाट दैनिक दर्जनौ ट्रक सुपारी तस्करी गराउने गरेका छन्।
सो ट्रक सोनमाका स्थानीय देवेन्द्र यादव, मुकेश यादवको नेतृत्वमा गएको स्थानीय बासिन्दाहरुले नियन्त्रणमा लिएका थिए। सो ट्रकमा रहेका ७० बोरा सुपारीको बिल बिजक नभएपछि नियन्त्रणमा लिएको सदभावना पार्टीका सहमहामन्त्री समेत रहेका देवेन्द्र यादवले बताए।
यता स्थानीय बासिन्दाले सुपारीका ट्रक नियन्त्रणमा लिएपछि सुपारी तस्करबीच केही बेर झडप भएका थिए। झडपलाई नियन्त्रणमा लिनका लागि खैरबन्नी, सम्सी, रघुनाथपुरबाट गएको प्रहरी टोलीले समेत ट्रकका ड्राइभर खलासी र स्थानीय सोनमा ८ का अशोक साह तेलीलाई भगाएका थिए भने सुपारी सहितको ट्रकमा नियन्त्रणमा लिएका थिए।
सो सुपारी भारत सितामढीको सोनबर्साका कुख्यात सुपारी तस्कर धर्मेन्द्र साह र महोत्तरीका विन्देश्वर नायकको रहेका छन। बरामद गरिएका सुपारी १२ लाख १८हजार मूल्य बराबर रहेका छन। बरामद गरिएका सुपारी र ट्रक आवश्यक कारवाहीका लागि विहान ४ बजे नै आन्तरिक राजस्व कार्यालय पथलैयामा बुझाइएको सशस्त्र प्रहरी सिमा सुरक्षा कार्यालय जलेश्वरका एसपी धिरेन्द्र पाण्डेले बताए।
तस्करीको रहस्य खुल्ने डरले सशस्त्र प्रहरी प्रमुखले सुपारी सहित ट्रक बारे पत्रकार सम्मेलन नगरीकनै रातारात पथलैया पठाइएको एसपी पाण्डेले बताए। यस अघि सशस्त्र प्रहरीले खैरबन्नीमा ६० केजी सुपारी बरामद गरेका थिए।
महोत्तरीको विभिन्न नाकाबाट भंसार,सशस्त्र प्रहरी र नेपाल प्रहरीको मिलोमतोमा अवैध रुपमा सुपारी भारत तर्फ तस्करी भईरहेको छ। नाकामा खटिएको सशस्त्र प्रहरी र भारतीय एसएसबीको टोलीले छोटो अवधिमै पटक पटक गरी करीव २० लाख रुपैयाबराबरको ठूलो परिमाणमा सुपारी बरामद गरेको तथ्यले महोतरी नाकामा तस्करी प्रयास पहिलेझै उच्च रहेको देखाउँछ। पटक पटक सुपारी बरामद भएपछि महोतरीमा सुरक्षा निकायका प्रमुख र भंसारको मिलोमतोमा संस्थागत रुपमा सुपारी तस्करी हुने गरेको छ।
सुपारी सिमा तस्कर भारतीय व्यापारी धर्मेन्द्र साह र विन्देश्वर नायकले सुपारी तस्करीका लागि नेपाल प्रहरी, सशस्त्र प्रहरीले मासिक रुपमा लिई लाखौ रुपैया नजराना दिई सुगा,सम्सी,सिस्वाकटैया,जलेश्वर खैरबन्नी, रघुनाथपुर बथनाहा खैरा नाकाबाट सुपारी तस्करहरुले दैनिक ७ बजे देखि राती २बजे सम्ममा १० देखि १५ वटा ट्रक सुपारी भारत छिराउने गरेका छन।सशस्त्र प्रहरी बल सिमा सुरक्षा कार्यालय जलसागरका सशस्त्र प्रहरी उपरिक्षक धीरेन्द्र पाण्डेलेसुपारी तस्करीबारे आफुलाई केही थाहा नभएको बताए। प्रहरीले सुपारीको अवैध निकासी रोक्न अभियान चलाइरहेको समेत उनले बताए।
प्रहरीले पूर्व क्षेत्रमा सुपारी तस्करीमा कडाई गरेपछि तस्करहरुले सशस्त्र प्रहरी र नेपाल प्रहरीको मिलोमतोमा महोत्तरी नाकाबाट सुपारी भारत तर्फ तस्करी गराउने गरेका स्रोतको दावी रहेको छ। तस्करी नियन्त्रणका लागि खटिएका सश्स्त्र प्रहरीहरु लाइन पाए पछि निस्कि्रय देख्न थालेको छ। ती नाकाहरुबाट सश्स्त्र प्रहरी र नेपाल प्रहरीकै सेटिङमै काम भइरहेको छ। प्रहरी स्रोत भन्छ, प्रहरीले अहिले सुपारी रोक्ने भन्दा सक्दो पैसा लिदै तस्करी गराउनमा सक्रिय देखिरहेकेा छ।
समाचार स्रोतका अनुसार पछिल्लो समय आयातित सुपारी प्रहरीकै मिलोमतोमा तस्करी हुने गरेको छ। सुपारी तस्करी नियन्त्रणका लागि सिमा क्षेत्रमा प्रहरीले निगरानी बढाएपनि उनीहरुकै उच्च पधादिकारीहरुको मिलोमतोमा विभिन्न नाकाबाट रातीको समयमा सुपारी तस्करी हुने गरेको छ।
सन् १९५० को नेपाल भारत वाणिज्य सन्धिमा तेस्रो देशबाट आयातित कुनै पनि बस्तु भारत निर्यात गरिनु अवैध मानिन्छ। आयातित सवै सामान स्वेदशमै खपत गर्नु पर्ने प्रावधान हुदाँहुँदै व्यवसायीले चाहिने भन्दा बढी सामान तस्करी गर्ने गरेको छ। तर यसरी सो सामान खुलेयाम्ा भारत तस्करी हुने गरे पनि सशस्त्र प्रहरी र नेपाल प्रहरीको प्रहरी चौकीहरु बेखबर देखिन्छ।
भारतमा तेस्रो मुलुकबाट सुपारी आयत गर्न प्रतिबन्ध लगाइएको छ। तेस्रो मुलुकबाट आयातित सुपारी पुनः भारत निकासी गर्न पाइदैन। मलेसिया सिंगापुर थाइल्याण्डलगायतका देशबाट नेपाल सुपारी आयात गरी सीमा क्षेत्रमा राखेर भारत निकासी हुने गरेको छ। तेस्रो मुलुकबाट आयातित सुपारी भारत निकासीमा नेपालकै केही व्यापारी र भारतकै ठूलो गिरोह सक्रिय रहेका प्रहरीको दावी छ। नेपालमै उत्पादित सुपारी भने निकासी गर्न पाइने कानुनी प्रावधान छ।
