समाचार प्रभावः
तीन महिना अगाडि आँखाको उपचार गरीदिने भन्दै झापावाट झुक्याएर पाँचथरस्थित सिद्धपोखरी सेवा सदनको ज्येष्ठ नागरिक आश्रममा छोडिएका एक वृद्धको आँखाको उपचार गराइने भएको छ।
‘आँखाको उपचार गरीदिने भन्दै झुक्याएर वृद्धाश्रममा’ भन्ने समाचार प्रकाशन भएपछि सम्वन्धित सरोकारवालाले आफ्ना कम्जोरीलाई स्वीकार्दै आँखाको उपचार गरिदिने प्रतिवद्धता जनाएका हुन्।
आश्रममा इलाम फिक्कल घर भइ झापाको शनि अर्जुन नगरपालिका १ मा रमेश भट्टराईको घरमा बस्दै आएका ७२ वर्षिय तिलोचन भण्डारीलाई झुक्याएर ल्याएर अलपत्र छोडेको समाचार प्रकाशन भएपछि रमेश भट्टराई सहितको सरेाकारवालाको टोलीले प्रतिवध्दता जनाएका हुन्।
गत शुक्रवार मानव अधिकारकर्मी र पत्रकारसँग कुरा गर्दै ज्येष्ठ नागरीक भण्डारीले भने, ‘मालिक रमेश भट्टराईले आँखा उपचारको लागि डाक्टरलाई भेट गर्न लैजाने भन्दै यहाँ ल्याएर छोडेर भागे,’ उनले भने, ‘भोलि आउँछु बस्दै गर्नु भनेर हिँडेका उनी अहिले सम्म फर्केनन्,’ उनको गुनासो थियो।
बुधवार आश्रम सञ्चालक संस्था सिद्धपोखरी सेवा सदन, मानव अधिकारकर्मी कानुन व्यवसायी र पत्रकारहरुका साथ सरोकारवालासँग कुरा गर्दै रमेश भट्टराईले ज्येष्ठ नागरिक भण्डारीको आँखाको उपचारमा लाग्ने सम्पूर्ण खर्च साथै आवश्यक पर्ने खाद्यान्य र उनको नागरीकता साथै ज्येष्ठ नागरीकको पेन्सनपट्टा समेत उपलव्ध गराउने प्रतिवद्धता जनाए।
उनले भने, उहाँलाई झुक्याएर ल्याएको होइन पाँचथरमा आँखाको उपचार हुने अस्पताल छ उपचार पछि उतै आश्रममा बस्नु पर्छ भनेको हुँ।
झापाको चारपानेभन्दा ठूलो अस्पताल कहाँ छ भनि पत्रकारले प्रश्न गरेपछि उनी नाजावाफ भएका थिए।
सहमतिमा आँखाको उपचारको लागि आवश्यक पर्ने सम्पूर्ण रकम रमेश भट्टराईले व्यहोर्ने साथै निजको आँखाको उपचारको लागि सिद्धपोखरी सेवा सदनले आवश्यक पहल गरी उनको उपचारमा तुरून्त लैजाने सहमति भएको सेवा सञ्चालक संस्था सिद्ध पोखरी सेवा सदनका राजेन्द्र काफ्लेले बताए।
आँखाको उपचार हुने भन्ने सुनेपछि ज्येष्ठ नागरिक भण्डारी खुसीले दंग छन्।
आफन्तहरूले समेत आफूलाई नहेरेको साथै आफ्नो अंश वापतको सबै सम्पति समेत तिनीहरूले नै खाइदिएको आरोप लगाउने उनी फिक्कल छेउमा मित्रलाल र वालकुमार आफ्ना भतिजहरू भएको भनेपनि यकिन ठेगाना बताउन सक्दैनन्।
गत फागुनमा रमेशले भण्डारीलाई उपचार गराउने भन्दै नगरपालिकाको सिफारीससहित आश्रममा ल्याएर छाडेका थिए।