भूकम्पले कतै जनधनमा क्षति पुर्याएको छ भने कतै विदेशी तथा स्वदेशी पर्यटक नआउँदा पर्यटन क्षेत्रमा असर गरेको छ। पोखराको दुई शैक्षिक सस्थामा भने पर्यटक नआउँदा विद्यालय र क्याम्पस अप्ठेरोमा परेका छन्। पोखरा १७ छोरेपाटनमा रहेको छोरेपाटन उच्च मावि र गुप्तेश्वर बहुमुखि क्याम्पसमा कार्यरत शिक्षक तथा कर्मचारीलाई तलब खुवाउन अप्ठेरो परेको व्यवस्थापन समितिका पदाधिकारीहरुले बताएका छन्।
छोरेपाटन उच्च माविले छोरेपाटनमा रहेको पातले छागाँको आम्दानी प्रयोग गर्दै आएको छ भने गुप्तेश्वर बहुमुखि क्यापसले छारेपाटनको गुप्तेश्वर गुफाको आम्दानीबाट सञ्चालन हुँदै आएका छन्। नेपालमा वैशाख १२ गते आएको महाभूकम्पपछि पर्यटक नआए पछि दुबै संस्थाको आम्दानी प्राय शून्य छ। छोरेपाटन उच्च मावि व्यवस्थापन समितिका अध्यक्ष टिकाराम पौडेलले पातले छागाँको आम्दानीबाट विद्यालयमा ७५ जना शिक्षक तथा कर्मचारी नीजि स्रोतबाट राखेको बताए। उनले आम्दानी नहुदा शिक्षक तथा कर्मचारीलाई कसरी तलव खुवाउने भन्ने भइरहेको बताए।
पातलेछागाँबाट बार्षिक रुपमा विद्यालयले करिब ७० लाख, सटर भाडाबाट ४५ लाख र विद्यार्थीहरुबाट ७५ लाख आम्दानी हुने गरेको पौडेले बताए। उनले भने ‘सरकारी कोटाका २५ जना शिक्षक तथा कर्मचारी र नीजीबाट ७५ जना शिक्षक तथा कर्मचारी छन्' पर्यटक आउन छाडे आम्दानी नभएर विद्यालय सन्चालन गर्न पनि कठिन हुने बताए। छोरेपाटन उच्च माविमा करिब २२ सय विद्यार्थीहरु अध्ययनरत रहेको बताउदै पौडेलले स्तरीय शिक्षा दिन तीनवटा माध्यमबाट पढाइ हुदै आएको बताए।
उनले कक्षा एक देखि १० कक्षा सम्म नेपाली, नेपाली/अग्रेजी र अंग्रेजी तीन सेक्टरमा पढाइ हुने गरेको बताए। उनले उच्च माविमा विज्ञान, व्यवस्थापन, मानवीकी र शिक्षा शास्त्रमा पढाइ हुदै आएको बताए। त्यसै गरि गुप्तेश्वर गुफाको आम्दानीबाट सन्चालन हुदै आएको गुुप्तेश्वर क्याम्पसमा गुफामा जान रोक लगाए पछि आम्दानी हुन छाडेको छ। एक महिनासम्म आम्दानी नहुँदा गुफामा कार्यरत १२ जना कर्मचारी र क्याम्पस तर्फ २६ जना प्रध्यापक र कर्मचारी कार्यरत रहेको गुप्तेश्वर गुफा व्यवस्थापन समितिका उपाध्यक्ष रविलाल शर्माले जानकारी दिए।
उनले आम्दानी नहुदा कर्मचारीहरुलार्इृ कसरी तलब खुवाउने हो भन्ने भैरहेको बताए। उनले क्याम्पसमा करिब ३ सय विद्यार्थी रहेको बताउदै प्रध्यापक तथा कर्मचारीका लागी बार्षिक रुपमा करिब ५० लाख खर्च लाग्ने गरेको जानकारी दिए। उनले वैशाख १२ गते गएको भूकम्प पछि गुफामा सर्वसाधारणलाई जानरोक लगाएको शर्माले बताए।