राष्ट्रपति रामवरण यादवले बुधवार त्रिभुवन विश्वविद्यालयमा भूकम्पले पुर्याएको क्षतिको निरीक्षण गरेका छन्। बिहान पौने ११ बजे त्रिवि केन्द्रीय कार्यालय पुगेका यादवलाई त्रिविका उपकुलपति हिराबहादुर महर्जनले भूकम्पले त्रिविमा पुर्याएको क्षति बारे जानकारी दिएका थिए।
वैशाख १२ गतेको भुकम्प र त्यसपछिका परकम्पले त्रिवि उपकुलपति कार्यालय, केन्द्रीय पुस्तकालय, बोटनी विभाग लगायतका भवनमा ठूलो क्षति पुगेको छ। अन्य भवनहरुमा पनि सामान्य क्षति पुगेको छ।
उपकुलपति महर्जनले भूकम्पले कीर्तिपुरसहित देशभरीका आंगिक क्याम्पसमा करिब २ अर्ब रुपैयाँ बराबरको क्षति भएको जानकारी पाएको सेतोपाटीलाई बताए। सबैभन्दा बढी क्षति उपकुलपति कार्यालय रहेको भवनमा पुगेको छ। तीन तलाको सो भवन अहिले दुई तला बनेको छ।
केन्द्रीय पुस्तकालय टहरामा सारिने
भूकम्पले क्षति पुगेको देशको सबैभन्दा ठूलो पुस्तकालयको निरीक्षणपछि राष्ट्रपति यादवले टहरामा भएपनि विद्यार्थीलाई पुस्तक पढन पाउने व्यवस्था मिलाउनु पर्ने बताएको महर्जनले जानकारी दिए।
दराजबाट खसेका पुस्तकहरु मिलाउन, नयाँ क्याटलग बनाउन दुई तीन महिनाजति समय लाग्ने भएकाले त्रिविले पनि टहराबाट भएपनि विद्यार्थीलाई पुस्तकालय सुविधा दिने तयारी गरिरहेको उनले बताए। ‘नक्सा बनाउने कार्य भइरहेको छ‘ महर्जनले भने ‘टहराबाटै भएपनि छिटै पुस्तकालय सुविधा दिनेछौं।‘
पूनर्निर्माणका लागि कोष
त्रिविले भूकम्पबाट भएको क्षति भएका भौतिक संरचनाको पूनर्निर्माण लागि कोष बनाएको छ। एक अर्ब ५० करोड रुपैयाँ जम्मा गर्ने लक्ष्य राखिएको त्रिवि भूकम्पीय क्षति पूनर्निर्माण कोषमा त्रिविले १० प्रतिशत रकम राख्ने छ भने त्रिवि पदाधिकारी र महासंघका प्रमुखको एक महिनाको तलब कोषमा जम्मा गरिनेछ। त्यस्तै प्राध्यापक र अधिकृत तहसम्मका कर्मचारीको १० दिन बराबरको तलब र अन्य कर्मचारीको ५ दिनको तलब पनि कोषमा जम्मा गरिनेछ।
नेपाल बैंक लिमिटेडको कीर्तिपुर शाखामा रहेको कोषको खाता नं ४५१०८४१७३ मा इच्छुक सबैले रकम जम्मा गर्न सक्ने उपकुलपति महर्जनले जानकारी दिए।
(तस्बिर सौजन्य: तारालाल श्रेष्ठको फेसबुक)
