राष्ट्रिय योजना आयोगले भूकम्प प्रभावित क्षेत्रका जनतालाई प्रभावकारी रुपमा राहत तथा पुनःस्थापना गर्न प्राविधिक एवं आर्थिक सहयोग गर्न जापानी अन्तर्राष्ट्रिय सहयोग नियोग(जाइका)लाई आग्रह गरेको छ ।
नेपाल भ्रमणमा रहेको जाइकाको अध्यक्षसहितको प्रतिनिधिमण्डलसँगको भेटमा आयोगका उपाध्यक्ष प्रा डा गोविन्दराज पोखरेलले वर्षाकाल अगावै भूकम्पपीडितलाई अस्थायी बसोबासको व्यवस्था गर्नुपर्ने भएकाले आर्थिक तथा प्राविधिक सहयोगको जरुरी रहेको बताएका हुन् । ‘‘जाइकाका अध्यक्षले नेपालमा जस्तोसुकै सहयोगका लागि आफू र आफ्नो संस्था प्रतिबद्ध रहेको र आवश्यक निर्णय गरिने बताउनुभयो’’ डा पोखरेलले भने।
जाइकाका अध्यक्ष अकिहिको तानकाले नेपालको विपत्तिमा आफूहरूले आर्थिक, प्राविधिक सहयोग उपलब्ध गराउन कुनै पनि कसर नराखिने आश्वासन दिए। जाइकाको उच्चस्तरीय प्रतिनिधिमण्डलले भूकम्पबाट प्रभावित क्षेत्रको अवलोकन गरी वस्तुगत अवस्थाको जानकारी लिइरहेको छ । रासस
