नागरिक दैनिकको प्रधान सम्पादकमा सेतोपाटी सहकर्मी गुणराज लुइँटेल नियुक्त भएका छन्। नागरिकका प्रधान सम्पादक प्रतिक प्रधानले सोमबारदेखि जिम्मेवारी छाडपछि लुइँटेल नियुक्त भएका हुन्।
नेपाल रिपब्लिक मिडिया स्रोतका अनुसार लुइँटेलले भोलि(मंगलबार) देखि सम्हाल्दैछन्। प्रधान दुई वर्षअघि नागरिकको प्रधान सम्पादकमा नियुक्त भएका थिए।
अढाइ दशकदेखि पत्रकारितामा सक्रिय लुइँटेलले कान्तिपुर, नागरिक,अन्नपूर्ण पोष्ट दैनिक लगायत अग्रणी पत्रिकाहरूमा बरिष्ठ सम्पादकीय सदस्यको जिम्मेवारी सम्हालीसकेका छन्।
यसअघि अन्नपूर्ण पोष्टका सम्पादक रहिसकेका उनी नागरिकको पश्चिमेली संस्करणको सम्पादक भइसकेका अनुभवी पत्रकार हुन्। कान्तिपुर दैनिकको समाचार सम्पादक र नागरिक दैनिकको सह-सम्पादकको भूमिका समेत निभाएका लुइँटेल सदा लेखनमा पनि सक्रिय छन्।
राजनीतिक, सामाजिक र समसामयिक विषयमा रिपोर्टिङ विष्लेषण र लेख लेख्ने लुइँटेलले पत्रकारिता र समाजशास्त्रमा स्नातकोत्तर गरेका छन्।
नागरिकबाट बाहिरिएका प्रधानले पत्रकारिताबाहेक पनि करिअर अघि बढाउने संकेत गरेका छन्। राजीनामा पुष्टी गर्दै प्रधानले सोमबार साँझ लेखेको ट्विटमा भनिएको छ,‘नागरिक दैनिकको जिम्मवारीबाट जेठ १२ देखि बिदा लिएको छु । देशमा आएको ठूलो भूकम्प पश्चात आफ्नो कामको दायरा फराकिलो बनाउने सोच लिएको छु।’
एक महिनाअघिको विनासकारी भूकम्पपछि प्रधान पीडितलाई राहत पुर्याउन सक्रिय थिए।
यसैबीच नागरिकका सह-सम्पादक सुदीप श्रेष्ठले पनि आजै राजीनामा दिएका छन्। दुई वर्षदेखि समाचार सम्पादकको जिम्मेवारीमा रहेका उनले ट्विट मार्फत जानकारी गराएका छन्, ‘सम्पादक प्रतीक प्रधानसँगै मैले आजैदेखि नागरिक दैनिकबाट बिदा लिएको छु। पछिल्लो दुई वर्षको अनुभव अविश्मरणीय रह्यो।’
समसामयिक विषयमा लेख रचना,‘फिचर’ लेखन र सम्पादन कलामा विशेष दख्खल राख्ने श्रेष्ठले यसअघि कान्तिपुर, नागरिक र सेतोपाटीमा काम गरिसकेका छन्।
