शनिबार राति आएको हावाहुरीका कारण पूर्वमा तीन जनाको मृत्यु भएको छ। प्रहरीका अनुसार हुरीसँगै परेको चट्याङले अन्य एक जनाको ज्यान गएको छ।
पूर्वक्षेत्रीय प्रहरी कार्यालय विराटनगरका अनुसार धरानस्थित बिपी कोइराला स्वास्थ्य विज्ञान प्रतिष्ठान धरानमा कार्यरत डा. रञ्जना देवकोटाको ज्यान गएको छ। अस्पताल परिसरमा रहेको रुख ढलेर किच्दा गम्भीर घाइते भएकी देवकोटाको उपचारका क्रममा राति मृत्यु भएको क्षेत्रीय प्रहरी सूचना शाखाका प्रहरी निरीक्षक श्यामल सुब्बाले सेतोपाटीलाई जानकारी दिए।
हावाहुरीको कारण रुखको हाँगा खसेर किच्दा झापा बेलडाँगी शरणार्थी शिविरकी चार वर्षीया एलविशा राईको मृत्यु भएको छ। उनकी आमा मनमाया राई गम्भीर घाइते छिन्। घरको बरण्डामा बसिरहेको बेला रुखको हाँगा खसेर आमाछोरीलाई लागेको थियो।
प्रहरीका अनुसार गम्भीर मनमायाको बिपी कोइराला स्वास्थ्य विज्ञान प्रतिष्ठानमा उपचार भइरहेको छ। त्यसैगरी, उदयपुर गुराँसे गाविस–९ की मुनाकुमारी थापाको मृत्यु भएको छ। रुख ढलेर किच्दा उनको मृत्यु भएको क्षेत्रीय प्रहरीले जनाएको छ।
यसैगरी, ओखलढुङ्गा जिल्लाको पातले गाविस–९ मा चट्याङले एक महिलाको मृत्यु भएको छ। पाँच जना घाइते भएका छन्। राति सवा ७ बजे परेको चट्याङले ३० वर्षीया देवी लामिछानेको घटनास्थलमै मृत्यु भएको प्रहरीले जनाएको छ। स्थानीय सम्झना बस्नेत गम्भीर घाइते भएकी छिन्। उनको मिसन अस्पताल ओखलढुङ्गामा उपचार भइरहेको छ।
चट्याङले नै स्थानीय कुमार लामिछाने, प्रमिला लामिछाने, केशरसिंह कार्की र डम्बर खत्री सामान्य घाइते भएका छन्। उनीहरूको स्थानीय अस्पतालमा उपचार भइरहेको प्रहरीले जनाएको छ। हावाहुरीले सुनसरी रामधुनी गाविस २ स्थित नेपाल टेलिकमको टावर ढलेको छ। पूर्वमा अन्य भएको क्षतिको विवरण आउन बाँकी रहेको प्रहरी निरीक्षक सुब्बाले जनाए।