शनिबार रातिको हावाहुरीका कारण रूख ढलेर किच्दा बीपी कोइराला स्वास्थ्य विज्ञान प्रतिष्ठानकी एनाटोमीमा पोष्ट ग्राजुएट गरिरहेकी एक डाक्टरको निधन भएको छ।
गोर्खा मुच्चोक ४ आमचोङकी २३ वर्षीया रञ्जना देवकोटाको निधन भएको हो। उनको बुबा खेलकुद मन्त्रालयका उपसचिव छन्। उनको निधनसँगै परिवार शोकमा डुबेको छ। घटना भएपछि प्रतिष्ठानको एमविविएस चौथो वर्षमा अध्ययरत उनकी बहिनी सरिता केही क्षण बेहोस बनिन्।
‘ज्यान गएको सुनेर अस्पतालमै बेहोस भइछन्,’ दाजू बाबुरामले फोनसम्पर्कमा भने ‘हामीले यहाँबाट बारम्बार फोनसम्पर्क गर्न खोज्यौं। फोनसम्पर्क हुन् सकेन् पछि बुझ्दा बेहोस भएको पाइयो।, राति डिउटीका लागि क्वाटरबाट हिडेकी उनीसँगै ४ जना थिए। अकस्मात साढे ८ बजेतिर आएको हावाहुरीले रुख ढल्ने क्रममा भाग्दा अर्को रुख ढलेर त्यसको मूल हागाको ठक्करबाट मृत्यु भएको प्रत्यक्षदर्शी डा. राजेन्द्र बस्नेतले बताए।
बस्नेतको ढाँडमा सामान्य चोट छ भने उनीसँगैकी डा. अञ्जना रसाइलीको खुट्टामा चोट लागेको उनले बताए। ‘डिउटीका लागि हिड्दै थियौं। उहाँहरु दुईपाइला अघि मात्रै हुनुहुन्थ्यो।, उनले भने ‘एक्कासी पछाडिको रूख ढलेपछि भाग्दा अघिल्तिरको रूखले उहाँलाई भेटेछ।’
उनी घटनास्थलमै मृत्युवरण हुन पुगेको उनले बताए। तत्कालै सिआरभी दिएर ५ सय मिटरको आकस्मिक कक्षमा ल्याइपुर्याउँदा मृत्यु भइसकेको उनले बताए। उनी चारदिदीबहिनी मध्येकी जेठी हुन्। पढाईमा समेत ट्यालेन्ट भएपछि उनीले छात्रवृतिमै प्रतिष्ठानमा अध्ययरत रहेकेा दाजु बाबुरामले फोनमार्फत् जानकारी दिए।
उनको परिवारले इलाका प्रहरी कार्यालय धरानलाईसमेत निवेदन दिइसकेका छन्। ‘निवेदन आएको छ।, पोष्टमार्टम भइरहेको छ।, इप्रका धरानका प्रहरी निरीक्षक मिलन भट्टराईले भने। उनको मृत्युले प्रतिष्ठानका विद्यार्थीहरु शोकमा डुबेका छन्। अधिकांश विद्यार्थीहरु पोष्टमार्टमको कक्ष मर्चरी विभागमा उपस्थित भेटिन्छन्। प्रतिष्ठानमा करिब दर्जन बढी रूखहरु ढालेका छन् भने दुई दर्जन बढी रूखका हागा भाच्चिएको सूचना शाखाका सूचना अधिकृत सुजेन्द्र गोले तामाङले बताए।
