पहिरो गएर थुनिएको कालीगण्डकीमा बनेको तालको आकार बढ्दै गएपछि सरकारले तल्लो तटका सबैभन्दा जोखिमपूर्ण वस्तीहरुको पहिचान गरेको छ। पश्चिमाञ्चल क्षेत्रीय प्रशासक दिनेश थपलियाका अनुसार ती गाउँका वासिन्दालाई सतर्क गराउँदै सुरक्षीत स्थानमा सर्न भनिएको छ।
प्राविधिकहरुले तालको अध्ययन गरेर उपाय नसुझाएसम्म प्रशासनले म्याग्दीदेखि स्याङ्जाको मिर्मीसम्मको पन्ध्र गाउँलाई सबैभन्दा संवेदनशिल ठहर्याएको छ। 'हामी त्यहाँका बासिन्दाको सुरक्षामा संवेदनसिल छौं,' उनले भने,'त्यसैले उनीहरुलाई सतर्क गराउन सुरक्षाकर्मी र संचार माध्यम परिचालित भइसकेका छन्।'
थपलियाका अनसार म्याग्दी, बाग्लुङ, पर्वत र स्याङ्जाका पन्ध्र गाउँलाई अत्याधिक संवेदनसिल भनिएको छ। गलेश्वर, बेनी, पर्वत बेनी, लुम्दी, फर्से, लस्दी, खनियाघाट, निरय, मालढुंगा, सहस्रधारा, नयाँ पुल, मोदी बेनी, पूर्तीघाट, सेती बेनी र मिर्मीका बासिन्दालाई धेरै सतर्क रहन भनिएको छ।