जिल्लाको उत्तरी क्षेत्र लामाबगरमा राहत बोकेर हेलिकोप्टर गईरहन्छन्। स्थानीयहरू राहतको आशामा हेलिकप्टर आएको र गएको हेरिरहन्छन्। हेलिकोप्टरबाट पुर्याईएको सामाग्री ओरालेकै स्थानमा सकिन्छ। अन्य स्थानका बासिन्दाहरु हेलिकोप्टरबाट आएको आवाज सुन्छन र चित्त बुझाउँछन्।
भूकम्पसँगै आएको पहिरोका कारण सडकमार्ग अवरुद्ध भएका कारण लामाबगरमा चरम खाद्यान्न संकट आईपरेको सो क्षेत्रबाट शनिबार सदरमुकाम आईपुगेका ईश्वर कुमार खड्काले जनकारी दिए। उनका अनुसार लामाबगरको वडा नं. ४, ५, ६, ७, ८, र ९ मा बसोवास गर्ने झण्डै ५ सय घरधुरीमा हालसम्म राहत पुग्न सकेको छैन।
खाद्यान्न कम मात्र उत्पादन हुने उक्त क्षेत्रमा अहिले चरम खाद्य संकट छ। ‘एक प्याकेट नुनलाई १ सय रुपैंया तिर्दा पनि पाईएको छैन’, उनले भने। ‘नुन मात्रै पुगेपनि गाँउलेहरुले निग्रो खाएर पनि दिन गुजार्न सक्थे।’
गाविस सचिव भरत पौडेल उक्त क्षेत्रमा राहत पुर्याउन नसकिएको कुरा स्वीकार्छन्। उक्त क्षेत्रमा माथिल्लो तामाकोसी जलविद्युत आयोजनाले बाँडेको एकथान त्रिपाल र जिल्ला विकास समितिमार्फत वितरण गरिएको प्रति परिवार २ हजार रुपैंयामात्र वितरण भएको उनको भनाई छ। ‘१२ वैशाखमा गएको भूकम्पका पीडितहरुलाई राहत लिएर गएका सवारी साधनहरु २९ वैशाखको भूकम्पका कारण सिङ्गटीमा नै रोकिएका छन्। ठूलो हेलिकोप्टर पाईएन सानो हेलिकोप्टरले पर्याप्त मात्रामा सामाग्री बोक्न सकेन', उनले भने। ‘आईतबारबाटै ठूलो हेलीकोप्टरबाट राहत सामाग्री लैजानका लागि काम भईरहेको छ।’
स्वास्थ्य संस्था स्वास्थ्यकर्मी विहिन
गाविसमा रहेको गोगर स्वास्थ्य चौकीमा अहिले कुनै स्वास्थ्यकर्मी छैनन्। चौकीमा ८ जनाको दरवन्दी रहेको थियो। जिल्ला स्वास्थ्य कार्यालयले स्वास्थ्य संस्था भूकम्पका कारण ध्वस्त भएपछि चौकीमा रहेका सबै स्वास्थ्यकर्मी सदरमुकाममा आएको जानकारी दिएको छ। कार्यालय प्रमुख खगेश्वर गेलालले सकेसम्म छिटो स्वास्थ्यकर्मी पठाउनका लागि प्रयास भैरहेको बताए। कहिलेसम्म स्वास्थ्यकर्मी पठाईन्छ भन्नेमा उनले प्रष्ट जवाफ दिएनन्।
क्षतिविवरण आएपछि १५ हजार बाँडिने
सरकारले भूकम्पपिडितका लागि आवास निर्माण गर्न जस्ता किन्न दिने घोषणा गरेको १५ हजार रुपैंयाँ क्षतिको विवरण प्राप्त भएपछि वितरण गर्ने भएको छ। स्थानीय विकास अधिकारी रेशमलाल कँडेलले क्षतिको विवरण लिनका लागि जिल्लाभर टोली खटिएको र टोलीको विवरण आईसकेपछि मात्र रकम वितरणको काम अगाडि बढाईने बताए। जिल्ला दैवि प्रकोप उद्धार समितिले दिएको जानकारी अनुसार शनिवारसम्म ३ ओटा गाविसमा खटिएको टोलीले विवरण बुझाएको छ। ताम्चेत दूधपोखरी, मार्बु र भुषाफेदा गाविसमा खटिएका टोलीले आफ्नो काम सम्पन्न गरेर प्रतिवेदन बुझाएका छन्।