भूकम्पपछि खोजी तथा उद्धारका लागि नेपाल आएका अमेरिकी शव विशेषज्ञ ब्राइन स्मिथ र नेपाली सेनाको संयुक्त टोलीले आज दोलखा जिल्लाको सिङ्गटी बजारको पहिरोबाट क्षतविक्षत अवस्थामा एक जनाको शव निकालेको छ ।
सो शव चिलङ्खा–७ निवासी जीवन मगरको हुन सक्ने नेपाली सेना बर्दबहादुर गणका सेनानी राजन दाहालले बताए। शवसँगै जीवन मगर लेखिएको परिचयपत्रसमेत फेला परेको थियो ।
सो क्षेत्रका स्थानीयले आफ्ना आफन्त बेपत्ता भएको भन्दै खोजी गरिदिन प्रहरीमा निवेदन दिएका थिए । सो निवेदनकै आधारमा अमेरिकी विज्ञ, नेपाली सेना, सशस्त्र प्रहरी र नेपाल प्रहरीले सिङ्गटी बजार क्षेत्रमा थप शव पुरिएको आशङ्कामा खोजी गरिरहेको छ ।
पहिलो भूकम्पपछि राहत लिन सिङ्गटी बजार गएका मगर पुनः वैशाख २९ गते गएको भूकम्पमा आएको पहिरोमा पुरिएको हुनसक्ने बताइएको छ । रासस
