गत शनिबार गएको विनाशकारी महाभूकम्पले ७ हजार ६ सय भन्दा बढीको ज्यान लियो। हजारौं घाइते भए।
देशका झण्डै साढे पाँच लाख घर पूर्ण या आंशिक रूपमा नष्ट भए। लाखौं नेपाली घरबार बिहिन भए।
अरू भूकम्प पीडित जस्तै घाइते हुनेको सूचीमा ‘हेल्प नेपाल नेटवर्क’का अध्यक्ष अरुणसिंह बस्नेत पनि परे।
उनको दाहिने घुँडामा चोट लाग्यो। यस्तै संस्थाका उपाध्यक्ष रवि मानन्धरको घर भत्किँदा उनकी बहिनीको दुःखद् निधन भयो।
तर, बस्नेत र मानन्धरका लागि लाखौं पीडितको पीडाका अगाडि आफूलाई लागेको शारीरिक, पारिवारी र मानसिक चोट फिका बन्यो।
गैरनाफामूलक गैरसरकारी संस्थाको नेतृत्वकर्ता भएको नाताले उनीहरूले विगत ८ दिनदेखि निरन्तर आफूले सकेको निःस्वार्थ सेवा पीडितका लागि गरिरहेका छन्।
बुधबार अपरान्ह चाबहिलस्थित कार्यालयमा पुग्दा आफ्नो कार्यकक्षमा सहयोगको अपेक्षा गर्दै जम्मा भएका सर्वसाधारणदेखि निःश्वार्थभावले पीडितलाई राहत वितरण तथा व्यवस्थापनमा खटिन चाहने व्यक्ति र देश विदेशबाट उनीहरुको अभियानमा सहयोग गर्न चाहनेको फोनमा बस्नेत व्यस्त देखिन्थे।
शुरूमा अभियानको पृष्ठभूमि बताउँदै बस्नेतले भने, ‘सन १९९९ मा पत्रकार रविन्द्र मिश्रको योजना अनुसार विश्वभर रहेका नेपालीबाट मासिक एक डलर जम्मा गरी समाजसेवाका लागि स्थापना भएको संस्थाले अहिले देशका विभिन्न भागमा करोडौं रूपैयाँ बराबरको सामाजिक काम गरिसकेको छ।'
घुँडामा ब्यान्डेज लगाएर अर्को कुर्चिमा खुट्टा सिधापार्दै बसेको बस्नेतले भने, ‘डाक्टरले ६ हप्ता आराम गर्न भनेपनि आफ्नो मनले नमानेपछि विगत ८ दिनदेखि पीडितका लागि राहत वितरणदेखि प्रभावित क्षेत्रको सरसफाइ र स्वास्थ्य सम्बन्धी जनचेतनामूलक काममा लागिरहेका छौं।’
हेल्प नेपालको अभियानमा अहिले विभिन्न संघसंस्थाका २ सय स्वयम्सेवक आवद्ध भएर ८० भन्दा भन्दा बढी ठाउँमा सेवा दिइरहेका छन्।
‘हामीले १ करोड रूपैयाँ उठाउने लक्ष्यका साथ सबैमा अपिल गरेपनि आजसम्ममा झण्डै ३ करोड रुपैया उठीसकेको छ,’ उनले थप्दै भने, ‘त्यसमध्ये हिजोसम्ममा ८५ लाख रुपैयाँ बराबरको सहयोग पीडितलाई हस्तान्तरण भइसकेको छ।’
भूकम्प आएलगत्तै विभिन्न जिल्लामा खाद्यान्न तथा पालको समस्या देखिएपछि आफूहरूले राहत वितरणका लागि खाद्यान्न पठाएपनि अहिले हेल्प नेपालको ध्यान प्रभावित क्षेत्रको सरसफाई र स्वास्थ्य सम्बन्धी जनचेतनामुलक कार्यमा केन्द्रीत भएको उनले बताए।
घर भत्किएर घरबारबिहिन भएकाहरूलाई अस्थायी बासस्थानका लागि आवश्यक टेण्ट बजारमा अभाव भएपछि संयुक्त राष्ट्रसंघको शान्ति मिसन अन्तर्गत सुडानमा कार्यरत नेपाली सेनाका एक मेजरको सहयोगमा कम खर्चमा अस्थायी टेण्ट बनाउन आफ्ना स्वयं सेवकहरुलाई सिकाइसकेको पनि उनले बताए। जसको भिडीयो युटुवमा पनि राखिएको छ।
‘वर्षायाम सुरू हुनुपूर्व घरबार बिहिन भएका पीडितहरुको लागि स्थानीय स्रोत साधनको प्रयोग गरी बढीमा ३ सय ५० रूपैयाको कालो प्लाष्टिकबाट ९ फिट चौडाइ र १२ फिट लम्बाईको दुईवटा अस्थायी टेण्ट बनाउन सकिन्छ,’ उनले भने।
धेरै टिकाउ नभएपनि स्थायी बासस्थान नबनाउँदासम्म केही समयका लागि अस्थायी व्यवस्थापन गर्न यो उपायले ठूलो राहत दिने पनि उनले दाबी गरे।
भूकम्प प्रभावित जिल्ला जिल्लाका व्यक्तिहरुले आफ्नो आवश्यकता अनुसार फोन र सामाजिक सञ्जाल फेसबुक मार्फत गरेको माग अनुसार संस्थाका प्रतिनिधिहरुले बास्तविकता बुझी उनीहरुलाई सक्दो सहयोग गर्दै आएका छन्।
संस्थाको तर्फबाट काभ्रे, सिन्धुपाल्चोक, नुवाकोट, गोर्खा, धादिङ, रसुवा दोलखा लागायतका जिल्लामा दुईदेखि तीनसयसम्मका दरले अस्थायी टेण्ट निर्माणका लागि बाक्लो प्लाष्टिक पठाउन र सरसफाइ र स्वास्थ्य सम्बन्धी जनचेतनामूलक कार्य थालेको छ।
‘आजदेखि हामीले टेण्ट बनाउने प्लाष्टिक सेट, संक्रमण रोक्ने औषधि, पिउने पानीमा राख्ने औषधिलगायतका सामान पठाउन थालेका छौ,’ उनले भने।
आफ्नो अभियानमा धरानको विपी कोइराला मेडिकल कलेज, नेपाली सेनाको टिचिङ अस्पताल, महाराजगञ्जको टिचिङ अस्पताल र नेपाल मेडिकल कलेज जोरपाटीलगायतका विद्यार्थीहरुले सहयोग गरिरहेको बस्नेतले बताए।