गत शनिबार गएको विनाशकारी महाभूकम्पले देशका २ लाखभन्दा बढी घर पूर्ण रुपले ध्वस्त भएका छन्।
गृहमन्त्रालयमा मंगलबार आयोजित पत्रकार सम्मेलनमा गृह प्रवक्ता लक्ष्मी ढकालले भने, ‘अहिलेसम्मको प्रारम्भिक तथ्यांक अनुसार, देशभरीबाट अहिलेसम्म २ लाख ५ हजार ५ सय ५२ घर पूर्णरुपले र १ लाख ८६ हजार २ सय ८५ घरमा आंशिक रुपमा क्षति पूगेको छ।
भूकम्पमा परि भौतिक संरचनामा क्षति पुग्दा विस्तापित हुन पुगको पीडितहरुको अस्थायी वासस्थानका लागि अहिलेसम्म १ लाख ६० हजार ७ सय ९९ थान टेण्ट तथा त्रिपाल वितरण गरिसकिएको उनले बताए।
पश्चिम बंगालकी मुख्यमन्त्री ममता बेनर्जीले सोमबार उपलब्ध गराएको १ लाख टारपोलिन झापाको काँकडभिट्टाबाट भूकम्प प्रभावित जिल्लाहरुमा पठाइएको पनि उनले जानकारी दिए।
त्यसैगरी सरकारको केन्द्रीय दैवि प्रकोप उद्दार कोषमा जम्मा भएको २ अर्व रकमबाट अहिलेसम्म १ अर्व ७९ करोड ९० लाख रुपैया प्रभावित जिल्ला जिल्लामा पीडितको राहत व्यवस्थापनका लागि पठाइएको उनले भने।
पीडितको राहतका लागि अहिलेसम्म ९६ हजार २ सय ३६ क्विन्टल चामल, ६ सय २० क्विन्टल चिनी, ५ हजार ७ सय ३५ क्विन्टल नून, १ लाख ८१ ह्जार १ सय ३४ कार्टुन चाउचाउ, २ हजार ६ केजी भुजिया, ३२ सय ४९ क्विन्टल चिउरा, १ हजार ७ सय ९६ केश पानी २९ हजार ६ सय ३५ कार्टुन विस्कुट ३ हजार ६ सय बोरा सिमी र ७५ बोरा दालमोट वितरण भइसकेको पनि उनले बताए।
अहिलेसम्मको तथ्यांक अनुसार, ७ हजार ४ सय ९३ जनाको निधन भएकोमा ७ हजार ३ सय ६९ जनाको शव सम्बन्धित आफन्तजनलाई बुझाइसकिएको ३ सय २८ जना अझैपनि हराइरहेका छन्।
गृह प्रवक्ता ढकालका अनुसार, काठमाडौं बेस बनाएर नेपाल आर्मीको ६ वटा हेलिकप्टरले ६ सय ८, निजी क्षेत्र ४ सय ८७ र भारतीय सेनाको हेलिकप्टरले २ सय ६३ उडान र भारतीय सेनाकै हेलिकप्टरले पोखरा बेस बनाएर १ सय ९० उडान गरी १ लाख २३ हजार ३ सय ८० क्विन्टल खाद्य सामाग्री र ८ सय ८ व्यक्तिको उद्धार गरेको थियो।
त्यसैगरी हालै अमेरिकाबाट आएका दुई जहाजले काठमाडौबाट दोलखामा दुई उडान मार्फत खाद्यन्न लगेको उनले बताए।
पीडितको राहतका लागि भारतबाट आएको सामाग्रीमा पुरानो २२ पोका लताकपडा फेला परेको विषयमा सोधिएको प्रश्नको जवाफ ढकालले भने, यस विषयमा काठमाडौ जिल्ला प्रशासन कार्यालयका प्रमुखलाई त्यो सामाग्री नियन्त्रणमा लिएर संबन्धित राहत उपलब्ध गराउने संस्थालाई फिर्ता गर्न निर्देशन दिएका छौं।