दुर्लभ बन्यजन्तु पाटेबाघको छाला र हडि्डसहित एक जना भारतीय नागरिकलाई प्रहरीले बर्दियाको मगरागाडिबाट पक्राउ गरेको छ।
भारत पन्जाव लुधियाना घर भई हाल बर्दिया मगरागढीमा अस्थायी रूपमा बस्दै आएका ६० वर्षीय रामजस बन्जाराबाट करिब १२ फिट लामो पाटेबाघको छाला र हडि्डसहित नेपाल प्रहरीको क्षेत्रिय अनुसन्धान समूहको टोलीले पक्राउ गरेको हो।
बाघको छाला र हड्डि बरामद भएको मगरागाडी बर्दिया राष्ट्रिय निकुन्जसँग जोडिएको क्षेत्र हो।
बरामद भएको छाला र हड्डी आलै भएकाले बाघ हालसालै बर्दिया राष्ट्रिय निकुन्ज वा निकुन्जको मध्यवर्ती क्षेत्रमा मारिएको हुनसक्ने क्षेत्रिय अनुसन्धान समूह प्रमुख प्रहरी नायव उपरीक्षक अशोक सिंहले बताए।
वन्यजन्तु तस्करहरूले निकुन्जमा बन्यजन्तुको शिकार गर्ने र खुल्ला नाकाको फाइदा उठाउँदै भारत तथा चीन पुर्याउने गरेका छन्। प्रारम्भीक अनुसन्धानका क्रममा अभियुक्त बन्जाराले मगरागढीका एक स्थानीयसँग ७ हजार रुपैयाँमा बाघको छाला र हड्डी खरिद गरेको खुलेको छ।
स्थानीय तस्करले बाघ लगायतका दुलर्भ बन्यजन्तुको शिकार गर्ने र भारतीय तस्करले बन्यजन्तुका महत्वपूर्ण अंगहरू बाहिर निकासी गर्ने गरेको प्रहरी नायब उपरीक्षक अशोक सिंहले बताए।
बरामद गरिएको बाघको अंग र पक्राउ परेका अभियुक्तलाई प्रहरीले नेपालगन्जमा पत्रकार सम्मेलन गरी सार्वजनिक गरेको हो। पक्राउ परेको अभियुक्त र बाघको छाला तथा हड्डीलाई आवश्यक कानुनी कारबाहीका लागि जिल्ला बन कार्यालय बर्दियामा पठाइएको छ।