भूकम्पबाट घाइते विरामी सलिना दाहाललाई पुरै उपचार नगरी फर्काउने अस्पताल केएमसी नभई थापाथलीस्थित नर्भिक अस्पताल भएको पत्ता लागेको छ।
हाल वीर अस्पतालमा उपचार गरईरहेकी दाहालका हजुरबुवा रामप्रसाद दाहालले हिजो सेटोपाटीसँग आफूलाई पैसा तिर्न नसकेपछि केएमसीले वीर अस्पताल पठाइएको बताएका थिए। हेर्नुहोस् समाचारमा-
नर्भिकले पनि गम्भीर अवस्थाकी सलिनालाई उपचार गरेर सामान्य बनाएपछि मात्र ट्रमा सेन्टरमा पठाएको दाबी गरेको छ।
‘सलिना आउने वित्तिकै हामीले उनको सिटिस्क्यान गर्यौँ, सबै चेकजाँच उपचार गरेका हौँ, उनी धेरै दिन अव्जर्भेसनमै बस्नुपर्ने भएकोले ट्रमा सेन्टर पठाएका हौँ,’ नर्भिक अस्पतालकी मेट्रोन उषा देवकोटाले भनिन्।
न्यूरो सर्जन राजिव झाले सलिनालाई सुरुदेखिनै हेरेका थिए। उनैले ट्रमा सेन्टर पठाउन रिफर गरेका थिए। उनी ट्रमा सेन्टरका पनि डाक्टर हुन्।
‘सोमबार बिहानको अव्जर्भेसनमा डाक्टर झाले सलिनालाई अलिक दिन अस्पतालमै भर्ना भएर बस्नुपर्ने भएकोले ट्रमामै पठाए हुन्छ भन्नु भएपछि हामीले सम्झाएर पठाएका हौँ,’ मेट्रोन देवकोटाले भनिन्।
उनका अनुसार,सलिनाका हजुरबुवा रामप्रसादले ट्रमा लानै मानेका थिएनन्।
रामप्रसादले भने नर्भिकले थप उपचारका लागि आफूसँग पैसा मागेको र 'हामीसँग पैसा छैन' भनेपछि बीर अस्पाताल पठाएको दावी गरेका छन्।
नर्भिककी राजिष्ट्रार प्रगति थापाले सलिनाको सम्पूर्ण उपचार निःशुल्क गरेको र थप पैसा पनि नमागेको बताएइन्।
आफूसँग पैसा नभएको भनेर रामप्रसादले नर्भिकभन्दा अन्त नातिनीलाई लैजान डराएका थिए।
‘मसँग पैसा छैन उता गएर उपचारको पैसा मागे के गर्ने?’ रामप्रसादले भनेका थिए।
‘तपाईँलाई उता गएपनि कसैले पैसा माग्दैन, गाह्रो पनि हुन्न। गाह्रो भयो भने यहीँ आउनुहोला,’ मेट्रोन देवकोटाले नै उनलाई सम्झाएको बताइन्।
त्यसपाछि नर्भिकमै काम गर्ने नर्सको साथ लगाएर एम्बुलेन्समा सलिनालाई ट्रमा पठाइएको थियो।
रामप्रसादले पनि आफ्नी नातिनिलाई पूरै उपचार नगरी फर्काउने अस्पतालको नाँउ लिँदा हिजो झूक्कीएर नर्भिकको सट्टा केएमसीको नाम लिन पुगेको बताएका छन्।
उनले सोमबार आफूसँग पैसा नभएपछि केएमसी अस्पतालले ट्रमासेन्टर पठाएको गुनासो गरेका थिए।
केएमसी अस्पतालले आफूले कुनै बिरामीलाई अन्यत्र रिफर नगरेको दावी गरेपछि हामी थप सत्य बुझ्न रामप्रसादलाई फेरि भेट्न आज ट्रमा पुगेका थियौं।
उनले सम्झेर केएमसीले होइन नर्भिकले फिर्ता पठाएको हो भने।
हिजो किन केएमसीलाई दोष दिनु भएको भएको भन्ने प्रश्न गर्दा उनले भने, 'खै मेरो दिमाग के भएर,भनेँ।हामी पहिले केएमसी पनि गएका थियौं, ठाउँ नभएर फर्क्यौं।धेरै अस्पताल डुलेर नर्भिक पुगेका थियौं त्यहि भएर म झुकिए होला’ उनले भने।
नातिनिलाई नर्भिकले सुरुमा उपचार गर्दा सिटिस्क्यान लगायतका उपचार गरिदिएको बताए। ‘औषधी पनि दिएको थियो। त्यही औषधी अहिलेसम्म छ,’उनले भने।
‘किन नर्भिकबाट यहाँ आउनुभएको त?’
‘अहिलेसम्म बच्चाको निःशुल्क उपचार गराइयो, अब तपाईँलाई पैसा लाग्छ, भर्ना हुन सक्नुहुन्छ भने गर्नुस भने। नभए बीरमा लगिदिन्छौँ, उतै सजिलो हुन्छ यहाँ उपचार गरेकै डाक्टरले उता पनि हेर्ने हो भन्नु भयो अनि हामी यता आयौँ,’ रामप्रसादले भने।
भूकम्पले भत्काएको घरले थिचेर उनकी नातिनी घाइते भएकी थिइन्। उनका आफन्तले तत्कालै मोटरसाइकलमा हालेर उनलाई धुलिखेल अस्पतालमा पुर्याएका थिए।
‘कान्छाबाको छोराले मोटरसाइकलमा हालेर धुलिखेल पुर्याएको रहेछ म त्यहीँ पुगेँ। त्यहाँका सिटिस्क्यान गर्नुपर्छ काठमाडौँ लैजानुस् भनेपछि राति ११/१२,बजे एम्बुलेन्समा हामी काठमाडौँ आएका हौँ,’ रामप्रसादले भने।
केएमसीका सीईओ दिपेन्द्र पुरुष ढकालले आफ्नो अस्पताले कुनै पनि बिरामीलाई अन्यत्र रिफर नगरेका, बरु अन्यत्रबाट रिफर भएर आएकालाई पनि भर्ना गरेको बताए।
'हामीले भूकम्पका पीडितहरुलाई सर्जरी लगायत सम्पूर्ण उपचार निशुल्क गरेका छौं,' ढकालले भने। अहिलेसम्म आफ्नो अस्पतालमा ४३० जना भन्दा बढी भूकम्पका घाइतेले उपचार गराएको र १०० जना अझै अस्पतालमै भर्ना रहेको उनले बताए।
क्षमायाचना: केएमसीको नाम हिजोको हाम्रो रिपोर्टिङ मुछिन गएकोमा हामी क्षमायाचना गर्छौं। यस्तो खालको त्रुटी भविष्यमा नहोस् भन्नेमा हामी थप सजग रहने छौं।मानवीय त्रुटिहरु हुन्छन तर हामीले गर्ने पत्रकारितामा आग्रह, दुराग्रह र डरको कुनै स्थान रहने छैन भन्ने हामी आम पाठकलाई फेरि पनि आस्वस्थ तुल्याउन चाहन्छौँ। - सम्पादक
