घर भत्किएर पुरिएकामध्ये अझै २७ भन्दा बढीको शव निकाल्न नसकिएको महानगरीय प्रहरी परिसर भक्तपुरले जनाएको छ।
परिसरका प्रहरी निरीक्षक यादव ढकालका अनुसार आजसम्म २३७ जनाको शव बरामद भएको र खोजी तथा उद्धार जारी छ। परिसरका प्रहरी उपरीक्षक विकास श्रेष्ठका अनुसार भक्तपुर नगरपालिका क्षेत्रका विभिन्न गल्लीभित्र अझै २७ जना हराइरहेको र उनीहरुको शव निकाल्न अझै नसकिएको बताए।
मृतकमध्ये एकै घर परिवारका छ जनासम्मको मृत्यु भएको प्रहरीले जनाएको छ। कतिपयको परिवारका सबैको मृत्यु भएकाले स्थानीयवासीले गुठीले सामूहिक दाहसंस्कार गरिदिएको छ। डोजर लान पनि नसकिने र व्यक्तिले तत्कालै छिटो भत्किएका घर पन्छाउन पनि नसक्ने भएकाले अझै पुरिएको शव निकाल्न नसकिएको बताए।
प्रहरीले सूर्यमढी, चोर्चा, दत्तात्रय, भेलुखेल, व्यासी र दधिकोटको हिमचुली रोडलगायत क्षेत्रका घर पन्छाएर शव निकाल्न सकेको छैन। उद्धारमा नेपाल प्रहरी, नेपाली सेना, सशस्त्र प्रहरी, विदेशी उद्धार टोली र स्थानीयवासी लागे पनि पर्याप्त जनशक्तिको अभाव र सहज स्थान नहुँदा खोज तथा उद्धारमा कठिनाइ आएको प्रहरीको भनाइ छ।
नेपाली काँग्रेस भक्तपुर नगर समितिका सभापति रवीन्द्र प्रधानले दत्तात्रय पछाडि एकै घरमा दुई व्यक्ति मृतावस्थामा देखिएको तीन दिन बितिसक्दा पनि प्रहरीले शव निकाल्ने प्रयास नगरेको बताए।उनले प्रहरी र प्रशासनलाई शव निकालिदिन आज पनि आग्रह गरे।
त्यसैगरी कतिपय स्थानमा आइतबारसम्म पनि उद्धार गरिदिन अनुरोध गर्दै पुरिएको स्थानबाट मानिस कराएको आवाज आएको र कतिपयले पुरिएकै ठाउँबाट आफन्तलाई मोबाइलमार्फत एसएमएस गर्दै बचाइदिन आग्रह गरेको स्थानीयवासीले बताएका छन्।
ती स्थानमा अझै खोज तथा उद्धार हुन नसकेको स्थानीयवासीले प्रशासनमा गुनासो गरेका छन्। पुरिएकामध्ये जीवितै पाउने आशा नभएको प्रहरीको भनाइ छ।
दधिकोटको हिमचुली चोकमा माधव बस्नेतको पाँचतले कुखुरा फार्ममा पुरिएकामध्ये सप्तरी घर भई दधिकोट बस्ने शिव मण्डलले दुई तलामुनि पुरिएका सिन्धुपाल्चोक खाडीचौर घर भई त्यहीँ काम गर्ने ३० वर्षीय चोकलाल तामाङ र ताराबहादुर तामाङको सकुशल उद्धार गरेका छन्।
सोही फार्ममा पुरिएका कामदारमध्ये रामेछापकी ३५ वर्षीया कमला खत्री र दोलखाकी २५ वर्षीया सविना ढुङ्गेलको शव भने अझै निकाल्न सकिएको छैन। उद्धारमा कठिनाइ आएपछि पुरिएका स्थानमा गन्ध आउन थालेको स्थानीयवासी बताउँछन्। प्रहरीले भने फेरि भूकम्प आउने डरले पनि कतिपय उद्धार टोली त्यस्ता ठाउँमा जान नसकेको जनाएको छ। रासस
