शनिबार गएको भूकम्पका कारण नेपालका ठूला संचारगृहका भवन क्षतिग्रस्त भएका छन्। भवन भित्र बसेर काम गर्ने अवस्था नभएपछि कान्तिपुर पब्लिकेशन र नागरिक दैनिकको प्रकाशन संस्था नेपाल रिपब्लिक मिडियाका पत्रकार तथा कर्मचारी अन्यन्त्र आश्रय लिएर काम गरिरहेका छन्।
काठमाडौँ तिनकुनेमा रहेको कान्तिपुर पब्लिकेसनको भवन भूकम्पले चर्किएपछि पत्रकारहरू अहिले भक्तपुरको पेप्सीकोलामा रहेको पब्लिकेसनको छापाखानाबाट समाचार सम्पादन र पत्रिकाका सामाग्री तयार गरिरहेका छन्।
‘पब्लिकसन रहेको भवनमा धेरै ठाउँमा चिराहरू आएको छ। अहिले त्यहाँ बसेर काम गर्न सक्ने अवस्था छैन’, कान्तिपुर दैनिकका सम्पादक सुधीर शर्माले सेतोपाटीलाई भने ‘हिजो हामीले पब्लिकेशन रहेको भवन बाहिर बसेर काम गर्यौं। आजदेखि छापाखाना रहेको स्थानबाट काम गर्दैछौँ।’
अहिले पब्लिकशन रहेको ६ तले भवनमा त्रासका कारण कोहीपनि प्रवेश गरेका छैनन्। शर्माले भने– अब तिनकुनेस्थित पब्लिकेशनको भवनमा कहिले सर्ने थाहा छैन। भवनको अवस्थाको विस्तृत अध्ययनपछि मात्रै टुंगो लाग्छ।
कान्तिपुर टेलिभिजनको अवस्था पनि उस्तै छ। टेलिभिजनको भवन र पब्लिकशनको भवन तिनकुनेमा एउटै कम्पाउण्ड भित्र छ। कान्तिपुर टेलिभिजनको प्रसारण पनि पब्लिकशनको मुख्यद्वार बाहिर सडकमा पाल टाँगेर सुचारु गरिएको छ।
सुन्धारामा कार्यालय रहेको मुलकको अर्को ठूलो प्रकाशन गृह नेपाल रिपब्लिक मिडियाको अवस्था पनि उस्तै छ। आइतबार आएको भूकम्पको दोस्रो ठूलो धक्कापछि नागरिक दैनिकका पत्रकार र कर्मचारी पनि सुन्धारास्थित जेडिए कम्प्लेक्समा रहेको कार्यालयमा गएका छैनन्। जेडिए कम्प्लेक्सपनि केही ठाउँमा चर्किएको छ। तर नागरिक कर्मीलाई त्योभन्दापनि ठूलो त्रास प्रवेशद्घार सँगै रहेको सिटिसी मलको भवन पुगेको क्षति हो। भर्खरै बनेको सो भवन कैंयौ ठाउँमा चिरा परेको छ। नागरिक दैनिकका पत्रकार र कर्मचारी अहिले बाटोपारि रहेको नेपाली सेनाको मुख्यालयको प्रांगणमा पाल टाँगेर काम गर्दैछन्। सोमबार प्रकाशन बन्द गरिएका नागरिक र रिपब्लिका दैनिक भोली (मंगलबार)देखि प्रकाशित हुने नागरिक दैनिकका समाचार सम्पादक सुदिप श्रेष्ठले सेतोपाटीलाई बताए।
‘भवनमा खासै क्षति त भएको थिएन। तर कार्यालय नजिकै रहेको सिटिसी मलमा ठूला चिरा परेका छन, पुरै भवन ढल्ला जस्तो छ,’ श्रेष्ठले भने ‘त्यसकारण नजिकै रहेको हाम्रो संचारगृहमा बसेर काम गर्न सक्ने स्थिति रहेन। शनिबारको भूकम्पपछि पनि हामीले काम गरिरहेका थियौं, तर आइतबारको ठूलो धक्कापछि पत्रकारहरू अफिस जान मानेनन्, अब दुइ चार दिनमा विस्तृत अध्ययनपछि कार्यालय रहेको भवनमा कहिले सर्ने भन्ने टुंगो लाग्ला।’
सडकमा टाँगिएको पालमुिन समाचार पढ्दै कान्तिपुर टेलिभिजनका समाचारवाचक विजय पौडेल।
पालमुिनबाट भइरहेको कान्तिपुर टेिलभिजनको प्रशारण हेर्दै सर्वसाधारण।
चउरमा काम गर्दै नागरिक दैिनकका पत्रकार र कर्मचारी।
सैनिक मुख्यालयमा नागरिक दैनिकका कर्मचारी र जेनेरेटर।
